Fransiya prezidenti Emmanuel Makron ukrainalik hamkasbi Vladimir Zelenskiy bilan telefon orqali muloqot qildi. Bu haqda BFM telekanaliga tayanib, “TASS” xabar berdi.
“Prezidentlar o‘rtasidagi suhbat tush payti boshlangan edi va hozirgina yakuniga yetdi”, — deyiladi xabarda. Telekanal ma’lumotlariga ko‘ra, bu Makron va Zelenskiy o‘rtasidagi Fransiya prezidentining 16-iyun kuni Kiyevga tashrifidan keyingi ilk suhbati. BFM ma’lumotlariga ko‘ra, kun tartibidagi mavzulardan biri Ukraina donining Odessadan eksport qilinishi to‘g‘risida gaplashish edi.
Yelisey saroyi hozircha suhbat haqida hech qanday tafsilotlarni rasman e’lon qilmagan.
Eslatib o‘tamiz, 22-iyul kuni Istanbulda jahon bozoriga oziq-ovqat va o‘g‘it yetkazib berish muammosini hal etish bo‘yicha hujjatlar to‘plami imzolangan. Rossiya va BMT o‘rtasidagi memorandumda jahon tashkiloti qishloq xo‘jaligi mahsulotlari va o‘g‘itlar eksportiga to‘sqinlik qiluvchi Rossiyaga qarshi cheklovlarni olib tashlash bo‘yicha ishlarda ishtirok etishi belgilab qo‘yilgan.
Yana bir hujjat Ukraina tomonidan nazorat qilinadigan Qora dengiz portlaridan donni eksport qilish mexanizmini belgilaydi. Rossiya, Turkiya, Ukraina va BMT o‘rtasidagi kelishuvlar to‘rt tomonlama muvofiqlashtirish markazini tashkil etishni nazarda tutadi, uning vakillari qurol-yarog‘ kontrabandasi va provokatsiyalarning oldini olish maqsadida don kemalarini tekshiradi.
Izoh (0)