Isroil bosh vaziri Yair Lapid BMT bosh kotibi Antoniu Guterrishga maktub yuborib, tashkilotning G‘azo sektorida Isroil va Falastinning HAMAS tashkiloti o‘rtasidagi ziddiyatni tekshirish bo‘yicha komissiyasini uning a’zolaridan biriga tegishli “antisemitizmga oid fikrlar” tufayli tarqatib yuborishni talab qildi, deb yozadi “RBK” Isroil hukumatiga tayanib.
“Janobi oliylari, bugun men sizni vaziyatni tuzatish uchun ushbu yo‘l qo‘yib bo‘lmaydigan masalada o‘z so‘zingizda turishingizni so‘rayman… OAVlarni ‘nazorat qilish’ uchun amal qiluvchi ‘yahudiy lobbisi’ga tuhmat zamonaviy tarixning eng qorong‘i kunlari haqida eslatadi. Antisemitizmga qarshi kurashni faqat gap bilan olib borish mumkin emas, buning uchun harakatlar ham kerak. Harakat qilish, komissiyani tarqatib yuborish vaqti keldi”, — deb yozdi bosh vazir.
Lapid komissiyaning ba’zi a’zolari, xususan, Milun Kotari omma oldida bildirgan antisemitizm ruhidagi fikrlarga e’tibor qaratdi. U antisionistik Mondoweiss blogiga bergan intervyusida Isroil BMT ishiga putur yetkazayotgani, “yahudiycha lobbi” esa ijtimoiy tarmoqlarni nazorat qilishga urinayotganini ma’lum qilgandi.
Isroil bosh vaziri fikricha, komissiya “antisemitizmni nafaqat qo‘llab-quvvatlayapti, balki rag‘batlantiryapti ham”.
Komissiya tekshiruv olib borayotgan ziddiyat o‘tgan yil mayida boshlanib, 11 kun davom etgandi. Vaziyat keskinlashuviga Quddusda arab oilalarining ko‘chirib yuborilishi tufayli yuzaga kelgan norozilik namoyishlari sabab bo‘ldi, shundan keyin tomonlar bir-biriga raketalar uloqtira boshladi.
G‘azo sektoridan Isroil hududiga qarata qariyb 3,5 mingta raketa uchirildi, oqibatda 12 fuqaro halok bo‘ldi. Isroil mudofaa armiyasi (SAXAL) bunga javoban G‘azo sektoriga hujum qildi, 232 falastinlik halok bo‘ldi. SAXAL halok bo‘lgan G’azo tinch aholisining ba’zilari Isroilgacha borib yetmagan o‘z raketalari orqali o‘ldirilganini da’vo qildi. Nizo o‘sha yili 21-may kuni, o‘t ochishni to‘xtatish rejimi kuchga kirganidan keyin yakunlandi.
G‘azoga hujumlarni to‘xtatishni yoqlab o‘shanda Isroil xavfsizlik mahkamasi ovoz bergandi. HAMASning islom dunyosi bilan aloqalar bo‘yicha idorasi a’zosi Ali Baraka o‘shanda Isroil bosh vaziri Binyamin Netanyaxu nizoda mag‘lubiyatga uchrab, Falastin xalqi esa g‘olib bo‘ldi, deb hisoblagan edi.
Izoh (0)