Ommaviy noroziliklar fonida Iroq poytaxti Bag‘dodga qo‘shinlar kiritildi, deb yozadi “RBK”.
Bosh vazir Mustafo al-Kozimiy matbuot xizmati ma’lum qilishicha, harbiylar namoyishchilarga qarshi jangovar va rezina o‘qlar hamda tutun shashkalarini qo‘llamaydi.
“Armiya Iroq xalqiga xizmat qiladi. Xavfsizlik kuchlari majburiyatlari namoyishchilarni himoya qilish, jamoatchilik va xususiy mulkni asrash, har qanday qonunbuzarliklar oldini olib, vaziyatni beqarorlashtirishga urinayotgan yovuz niyatlilarni aniqlashdan iborat”, — deya bayonot berdi Iroq Mudofaa vazirligi.
Iroq xavfsizlik xizmati qo‘shimcha qilishicha, xavfsizlik kuchlari va harbiylar “har qanday sharoitlarda” o‘zlarining mamlakatga sodiqligini isbotlagan va “siyosiy masalalarga aralashmayapti”.
Bag‘dodda norozilik namoyishlari iyul oxirida boshlandi. Bu o‘tgan yil oktabrida, Iroqda saylovlar o‘tkazilganidan beri eng katta ko‘lamli aksiyadir. O‘shanda shialar yetakchisi Muktada as-Sadr rahbarlik qiluvchi “Sadrchilar harakati” nisbatan ko‘pchilik ovozni yig‘gan, ammo hokimiyat tepasiga kela olmagan edi: yangi hukumat shakllantirish haqidagi muzokaralar tomonlar, birinchi navbatda, shialar va kurd guruhlarining murosasizligi tufayli boshi berk ko‘chaga kirib qoldi.
30-iyul kuni namoyishchilar parlament binosini egallab oldi va o‘tirgan holda ish tashlash e’lon qildi. Ular bosh vazir lavozimiga as-Sadrning raqibi — Muhammad as-Sudaniy nomzodi ilgari surilishiga qarshi chiqmoqda. U “Koordinatsiya tuzilmasi” bloki vakili bo‘lib, shialar partiyalarining ushbu alyansini va as-Sudaniyning o‘zini ham namoyishchilar qo‘shni Eronning gumashtalari deb hisoblaydi.
Izoh (0)