Жазоир президенти мамлакат БРИКСга қўшилишга тайёрлигини маълум қилди

Жазоир БРИКС блокига қўшилишга қизиқиш билдирмоқда, бу ҳақда республика президенти Абдулмажид Теббун маълум қилди, деб ёзади «РБК».

«Жазоирда БРИКСга қўшилиш учун деярли барча шароитлар бор ва у ушбу альянсга қўшилишга кучли қизиқиш билдирмоқда», — деди у.

Унинг сўзларига кўра, БРИКСга қўшилиш Жазоирга «қўш қутбли низолар»дан узоқда бўлиш имкониятини беради.

Россия президенти ёрдамчиси Юрий Ушаков Москва БРИКСнинг эҳтимолий кенгайишига ижобий қарашини, аммо «бу муаммога жуда эҳтиёткорлик билан, пухталик билан ёндашиш керак»лигини айтди. Россия томони қўшилиш учун нозмзодларга жараёнлар ва талабларни белгилашни таклиф этмоқда, деди у. Ушаковнинг фикрича, биринчи шундай форматлар топиш керакки, улар бошланғич босқичда бирлашма билан кузатувчилар сифатида ҳамкорлик қилиш имконини берсин.

БРИКС 2006 йил июнида Петербург иқтисодий форуми доирасида Бразилия, Россия, Ҳиндистон, Хитой иқтисодиёт вазирлари иштирокида ташкил топган. 2010 йилда унга Жанубий Африка Республикаси қўшилган.

Июнь охирида Эрон ва Аргентина БРИКСга қўшилиш учун ариза берган эди. Ўшанда Россия ТИВ расмий вакили Мария Захарова: «Оқ уйдагилар дунёда яна нимани ўчириб қўйиш, тақиқлаш ва бузиш ҳақида ўйлаётган пайтда, Аргентина ва Эрон БРИКСга аъзо бўлиш учун аризалар топширди», — деган эди.

Шунингдек, июль ўрталарида Туркия, Миср ва Саудия Арабистони БРИКС давлатлари гуруҳига кириш учун тайёрланаётгани маълум бўлганди.