AQSH prezidenti Jo Baydenning koronavirus uchun topshirgan testi yana musbat natijani berdi. Bu haqda uning davolovchi shifokori Kevin O’Konnor ma’lum qildi. Bayonot Oq uy saytida chop etilgan.
21-iyul kuni Amerika yetakchisi koronavirus bilan kasallangani ma’lum bo‘lgan edi, biroq o‘shandan keyin 26—29-iyul kunlari o‘tkazilgan testlar natijalari manfiy bo‘lgan, dedi O’Konnor. 30-iyul kuni esa Baydenning COVID-testi musbat chiqqan.
Baydenning o‘zi unda kasallik alomatlari yo‘qligini ta’kidladi, shunga qaramay 79 yoshli siyosatchi o‘zini izolyatsiya qilishni rejalashtirmoqda.
O‘tgan hafta koronavirus aniqlanganda Bayden muolaja uchun Pfizer kompaniyasining virusga qarshi “Pakslovid” preparatini qabul qilgan. Amerika ommaviy axborot vositalari, jumladan, The Washington Post nashrining yozishicha, ushbu preparatni qabul qilganlarda ba’zan qayta infeksiyalanish holatlari sodir bo‘ladi.
Izoh (0)