Olti oylik ko‘rsatkich: Buxoroda ekologiya sohasida mingdan ortiq holatda qonun buzilgan

Buxoro viloyati ekologiya va atrof-muhitni muhofaza qilish boshqarmasi tomonidan o‘tkazilgan matbuot anjumanida boshqarma boshlig‘i Murod Umarov hududda yilning dastlabki 6 oyida mingdan ortiq qonun buzilishi holati aniqlanganini ma’lum qildi.

Ta’kidlanishicha, 2022-yilning birinchi yarim yilligida 1376 ta davlat ekologik nazorat tadbiri o‘tkazilgan. Aniqlangan qonun buzilishi holatlari bo‘yicha ma’muriy jarimalar qo‘llanilgan. 144 ta holat yuzasidan 364,932 million so‘m tabiatga yetkazilgan zarar undirilgan. Shundan atmosfera havosini muhofaza qilish yo‘nalishida 262 nafar huquqbuzarga nisbatan 64,155 million so‘m ma’muriy jarima qo‘llanilgan.

Suv resurslari yo‘nalishida 95 nafar huquqbuzarga nisbatan 42,390 million so‘m, chiqindilarni nazorat qilish yo‘nalishida 576 nafar huquqbuzarga nisbatan 216,675 million so‘m ma’muriy jarimalar undirilgan.

Yer resurslari va yerosti boyliklarini muhofaza qilish, bioxilma-xillik va muhofaza qilinadigan tabiiy hududlar yo‘nalishida ham huquqbuzurlarga nisbatan tegishli tartibda chora ko‘rilgan.

O‘rmon fondiga kirmaydigan daraxt kesilishi bilan bog‘liq 84 ta qonun buzilishi holati aniqlangan. 205 ta mevali hamda manzarali daraxt kesilgan, shikastlangan va zarar yetkazilgani uchun huqubuzarlarga nisbatan 113 million 400 ming so‘m jarima hamda 98 million 923 ming so‘m tabiatga yetkazilgan zarar hisoblangan.

Saksovul butalarini kesish, sindirish bilan bog‘liq 28 ta qonun buzilishi holati aniqlanib, 37 million 800 ming so‘m jarima qo‘llanilgan hamda 33 million 717 ming so‘m tabiatga yetkazilgan zarar hisoblangan. Boshqa butalar, ya’ni qandim, yulg‘un, cherkiz butalarini sindirish bilan bog‘liq 29 ta qonunbuzilish holati aniqlanib, 33 million 750 ming so‘m jarima qo‘llanilgan hamda 3 million 100 ming so‘m tabiatga yetkazilgan zarar hisoblangan.

Ov qilish bilan bog‘liq 32 ta qonun buzilishi holati bo‘yicha huquqbuzarlarga nisbatan 44 million 550 ming so‘m jarima hamda 8 million 343 ming so‘m tabiatga yetkazilgan zarar hisoblangan. Shuningdek, baliq ovlash bilan bog‘liq 31 ta holat aniqlangan bo‘lib huqubuzarlarga nisbatan 43 million 200 ming so‘m jarima hamda 6 million 840 ming so‘m tabiatga yetkazilgan zarar hisoblangan.