Samarqandda ko‘prikdan tushib ketgan “ZIL” haydovchisi rulni mast holda boshqargani ma’lum bo‘ldi

Samarqand shahrida 28-iyul kuni “ZIL” yuk mashinasi ko‘prikdan tushib ketgandi. Yo‘l harakati xavfsizligi xizmatining ma’lum qilishicha, hodisaga haydovchining mast holda avtomobil boshqargani sabab bo‘lgan.

Qayd etilishicha, 28-iyul kuni soat 11:40 atrofida Samarqand shahrining Bo‘stonsaroy va Rudakiy ko‘chalari kesishgan chorrahada harakatlanib kelayotgan “ZIL” transport vositasi haydovchisi M.Ch. rul boshqaruvini yo‘qotib, shu chorrahadagi ko‘prikdan pastga tushib ketgan.

Haydovchi tibbiyot birlashmasiga olib borilib, shifokor yordami ko‘rsatilgan. Hozirda ahvoli yaxshi. Tibbiyot xodimlari tomonidan tekshiruv o‘tkazilganda u yuk mashinasini spirtli ichimlik iste’mol qilgan holda boshqargani ma’lum bo‘lgan.

Holat yuzasidan dastlabki surishtiruv ishlari olib borilmoqda.