Farg‘ona shahrida yonida giyohvandlik moddalarini saqlab kelayotgan shaxs 18-iyul kuni qo‘lga olindi. Bu haqda viloyat ichki ishlar boshqarmasi axborot xizmati xabar berdi.
Ta’kidlanishicha, Farg‘ona viloyati IIB 1-mintaqaviy hudud PPX otryad 2-guruh xodimlari va shahar IIB JQB xodimlari tomonidan tezkor tadbir o‘tkazilgan. A.I. mahalla hududida o‘zini shubhali tarzda tutgani uchun yoni xolislar ishtirokida ko‘zdan kechirilganda marixuana va gashish giyohvandlik moddalarini saqlab kelayotgani aniqlanib, daliliy ashyo tariqasida olingan.
Mazkur holat yuzasidan shahar IIO FMB huzuridagi tergov bo‘limi tomonidan Jinoyat kodeksining 276-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 1-qismi bilan jinoyat ishi qo‘zg‘atilib, hozirda tergov harakatlari olib borilmoqda.
Ma’lumot uchun, ushbu jinoyatni sodir etgan shaxs 3 yilgacha ozodlikdan mahrum qilish bilan jazolanishi mumkin.
Izoh (0)