Buxoro viloyat IIB boshlig‘i tuman Ichki ishlar bo‘limi rahbarlaridan haftasiga 2 ming dollardan ulush olishini rad etdi. Bu haqda viloyat IIB boshlig‘i Shuhrat Aliyev ishtirokidagi matbuot anjumanida ma’lum qilindi, deya xabar berdi “Daryo” muxbiri.
Ma’lum bo‘lishicha, bugun Buxoro viloyat IIBda jurnalist va blogerlar uchun matbuot anjumani tashkil etilib, Ichki ishlar boshqarmasi va uning quyi tizimlarida amalga oshirilayotgan islohotlar haqida ma’lumot berilgan.
Ta’kidlanishicha, 2022-yilning olti oyi davomida viloyat IIBga jami 8241 ta murojaat kelib tushgan.
“Fuqarolarning turli mazmundagi bu murojaatlari o‘tgan yilning shu davriga nisbatan 1516 taga, ya’ni 22,5 foizga oshdi. Shuningdek, tizimda faoliyat yuritib kelgan xodimlarning noo‘rin xatti-harakatlari ustidan berilgan shikoyatlar soni 25 foizga, 17 taga kamaygan. Xizmat intizomi va qonunchilikni buzgan 82 nafar xodimga nisbatan turli ko‘rinishdagi intizomiy ta’sir choralari qo‘llanildi. Salbiy holatlarga ko‘ra, 32 nafar xodim ichki ishlar organlari safidan bo‘shatildi. Xizmat intizomini buzish holatlari oshgan sohaviy xizmatlar haqida to‘xtaladigan bo‘lsak, huquqbuzarlik profilaktika boshqarmasida 13 taga, tashkiliy boshqarma 3 taga, xavfsiz turizm boshqarmasida 2 taga oshgan. Ma’muriy huquqbuzarliklar holatlari bo‘yicha jami 48 nafar xodim ma’muriy javobgarlikka tortildi”, — dedi Shuhrat Aliyev.
Bildirilishicha, shu davr mobaynida IIB xodimlari tomonidan 1 ta jinoyat sodir etilgan.
Matbuot anjumanida qatnashgan bloger Dilfuza Ibodova viloyat IIB boshlig‘iga yuzlanib, ijtimoiy tarmoqlarda boshqarma boshlig‘i qo‘li ostidagilardan haftasiga ulush olayotgani yozilganini aytib, buning qanchalik haqiqatga yaqinligini so‘ragan. Boshqarma boshlig‘i esa buni rad etgan.
“Norasmiy saytlarga berilayotgan xabarlarga ma’lumot berilmaydi. Boshqarma boshlig‘ining faoliyatini ham nazorat qiladigan va baho beradigan rahbarlar bor. Bizning faoliyatimiz bilan bog‘liq bo‘lgan vaziyatlar ham ichki ishlar vazirligi topshirig‘iga asosan o‘rganiladi, tekshiruv o‘tkaziladi. Ijtimoiy tarmoqlarda axborot tarqatuvchilar tomonidan aniq ma’lumot keltirilmagan. Shu bois, bunga sharh berishni zarurat, deb bilmayman. Agar haqiqatan ham faktlari bo‘lsa, prokuratura yoki boshqa organlarga ma’lumotlarni taqdim etishi mumkin. Vaj mutlaqo noto‘g‘ri va uni rad etaman”, — dedi Shuhrat Aliyev.
Izoh (0)