“Men haqimda hech bo‘lmaganda bir kun gapirmaslikni iloji yo‘q”. Ronaldu ijtimoiy tarmoqlardagi xabarlarga munosabat bildirdi

Krishtianu Ronaldu “Manchester Yunayted”ni tark etish istagi haqidagi xabarlarga keskin munosabat bildirdi.

37 yoshli futbolchi Instagram’da u haqidagi yangiliklarni yig‘ayotgan muxlis akkauntidagi post ostiga izoh yozdi.

Ronaldu quyidagi mazmundagi xabarga munosabat bildirdi: “Jorje Mendesh ‘Manchester Yunayted’ga Krishtianu Ronaldu ketishni xohlayotganini ma’lum qildi. Muzokaralar ijobiy o‘tmadi, Mendesh Ronalduning ketishiga ishonchi komil emas. Ser Aleks Fergyuson vaziyatga aralashdi. Mankunianliklar Ronaldu sotilmasligini ta’kidlamoqda”.

Krishtianu ushbu postga quyidagi izohni yozdi: “Men haqimda hech bo‘lmaganda bir kun gapirmaslikni iloji yo‘q, aks holda OAV pul topa olmaydi. Bilasizmi, yolg‘on gapirmasangiz, odamlarning e’tiborini jalb eta olmaysiz. Davom etavering. Balki bir kun siz ham rost xabarni joylashtirarsiz”.

Avvalroq portugaliyalik hujumchi “Manchester Yunayted” rahbariyati bilan o‘z kelajagini muhokama qilgani xabar qilingandi.