Germaniyalik hakam Deniz Aytekin xalqaro maydondagi faoliyatini yakunladi.
44 yoshli hakam 2011-yildan beri FIFA hakamlar ro‘yxatiga kirardi. Shundan buyon Chempionlar Ligasining 25, Yevropa Ligasining 29 va xalqaro o‘yinlarning 23 tasini boshqargan.
Aytekin 2016/17-yilgi Chempionlar Ligasi 1/8 final javob bahsidan o‘rin olgan “Barselona”—“PSJ” o‘yinida bosh hakam sifatida ishlagan. Parijliklar dastlabki o‘yinda kataloniyaliklarni 4:0 hisobida mag‘lub etgandi. Biroq Aytekin ishlagan javob o‘yinida “Barselona” 6:1 hisobida g‘alaba qozongan. Uning o‘yindagi qator qarorlari bahslarga sabab bo‘lgandi.
So‘nggi bir necha kun ichida oilam va do‘stlarim bilan xalqaro hakamlik faoliyatidagi kelajagim haqida ko‘p gaplashdim. Natijada 12 yillik faoliyatdan so‘ng FIFA referiligini tark etish qarori to‘g‘ridek ko‘rindi.Ushbu qarorimni UEFA bosh hakamlar inspektori Roberto Rosetti bilan ham muhokama qildim. Frankfurtdagi UEFA kursi doirasidagi ko‘plab hamkasblarim bilan xayrlashaman va ular bilan o‘tkazilgan ajoyib vaqt uchun rahmat aytmoqchiman.
Agar sog‘lom bo‘lsam, yana bir necha yil Germaniyada yuqori saviyada ishlashga harakat qilaman. Bu qadamdan so‘ng men Bundesliga va ichki musobaqalarga e’tibor qaratishni va keyingi bir necha yilni iloji boricha muvaffaqiyatli o‘tkazishni istayman. Keyingi vazifalarni intiqlik bilan kutaman.
Deniz Aytekin, xalqaro toifadagi hakam
Izoh (0)