«Мен ҳақимда ҳеч бўлмаганда бир кун гапирмасликни иложи йўқ». Роналду ижтимоий тармоқлардаги хабарларга муносабат билдирди

Криштиану Роналду «Манчестер Юнайтед»ни тарк этиш истаги ҳақидаги хабарларга кескин муносабат билдирди.

37 ёшли футболчи Instagram’да у ҳақидаги янгиликларни йиғаётган мухлис аккаунтидаги пост остига изоҳ ёзди.

Роналду қуйидаги мазмундаги хабарга муносабат билдирди: «Жорже Мендеш ‘Манчестер Юнайтедъга Криштиану Роналду кетишни хоҳлаётганини маълум қилди. Музокаралар ижобий ўтмади, Мендеш Роналдунинг кетишига ишончи комил эмас. Сер Алекс Фергюсон вазиятга аралашди. Манкунианликлар Роналду сотилмаслигини таъкидламоқда».

Криштиану ушбу постга қуйидаги изоҳни ёзди: «Мен ҳақимда ҳеч бўлмаганда бир кун гапирмасликни иложи йўқ, акс ҳолда ОАВ пул топа олмайди. Биласизми, ёлғон гапирмасангиз, одамларнинг эътиборини жалб эта олмайсиз. Давом этаверинг. Балки бир кун сиз ҳам рост хабарни жойлаштирарсиз».

Аввалроқ португалиялик ҳужумчи «Манчестер Юнайтед» раҳбарияти билан ўз келажагини муҳокама қилгани хабар қилинганди.