Ijtimoiy tarmoqlarda Behzod Latifov ismli shaxs yovvoyi hayvonlarni boqib, ular ortidan biznes qilayotgani, xususan, timsoh bolalarini pullayotgani bo‘yicha e’lonlar joylashtirilmoqda. Bu haqda Telegram’dagi “Ekolog.uz” kanalida xabar berildi.
Aytilishicha, u o‘zining Instagram’dagi sahifasiga surat va videoni joylashtirgan. Unda timsoh bolalari 1500 dollardan sotilishi keltirib o‘tilgan.
“Ekolog.uz” shu o‘rinda bu timsoh bolalari qayerdan, qachon, qaysi hujjatlar asosida, qaysi bojxona postidan olib o‘tilgani haqida savol bilan murojaat qilgan.
To‘g‘ri, Behzod Latifovning yovvoyi hayvonlarni boqish uchun qonuniy ruxsatnomasi bordir, ammo bu ruxsatnoma qonun talablarini buzib, yovvoyi hayvonlarning savdosi bilan noqonuniy shug‘ullanish mumkin, degan vakolatni bermaydi. Bu safar ham Behzod Latifov surat va videolar menga tegishli emas, ijtimoiy tarmoqlardan olgandim, degan vajlarni keltirar, balki?Agar shunday vajlar keltirilsa, fuqaro, albatta, bu videolar va suratlar aynan qaysi tarmoqdan olinganini isbotlab berishini so‘raymiz. Videoda o‘zbek bolalari Toshkent shevasida gapirganini eshitish mumkin yoki buni ham montaj asosida videoga qo‘yishdimikan?
Ekologiya va atrof-muhitni muhofaza qilish davlat qo‘mitasi ushbu holatni o‘rganishini so‘raymiz. Timsohlar tez katta bo‘luvchi hayvonlar hisoblanadi, ertaga bu hayvonlar katta bo‘lib borgani sayin ularni nazorat qilib borish ham qiyinlashib, xavfli bo‘lib boradi, — deyiladi xabarda.
Izoh (0)