Ижтимоий тармоқларда Беҳзод Латифов исмли шахс ёввойи ҳайвонларни боқиб, улар ортидан бизнес қилаётгани, хусусан, тимсоҳ болаларини пуллаётгани бўйича эълонлар жойлаштирилмоқда. Бу ҳақда Telegram’даги «Ekolog.uz» каналида хабар берилди.
Айтилишича, у ўзининг Instagram’даги саҳифасига сурат ва видеони жойлаштирган. Унда тимсоҳ болалари 1500 доллардан сотилиши келтириб ўтилган.
«Ekolog.uz» шу ўринда бу тимсоҳ болалари қаердан, қачон, қайси ҳужжатлар асосида, қайси божхона постидан олиб ўтилгани ҳақида савол билан мурожаат қилган.
Тўғри, Беҳзод Латифовнинг ёввойи ҳайвонларни боқиш учун қонуний рухсатномаси бордир, аммо бу рухсатнома қонун талабларини бузиб, ёввойи ҳайвонларнинг савдоси билан ноқонуний шуғулланиш мумкин, деган ваколатни бермайди. Бу сафар ҳам Беҳзод Латифов сурат ва видеолар менга тегишли эмас, ижтимоий тармоқлардан олгандим, деган важларни келтирар, балки?Агар шундай важлар келтирилса, фуқаро, албатта, бу видеолар ва суратлар айнан қайси тармоқдан олинганини исботлаб беришини сўраймиз. Видеода ўзбек болалари Тошкент шевасида гапирганини эшитиш мумкин ёки буни ҳам монтаж асосида видеога қўйишдимикан?
Экология ва атроф-муҳитни муҳофаза қилиш давлат қўмитаси ушбу ҳолатни ўрганишини сўраймиз. Тимсоҳлар тез катта бўлувчи ҳайвонлар ҳисобланади, эртага бу ҳайвонлар катта бўлиб боргани сайин уларни назорат қилиб бориш ҳам қийинлашиб, хавфли бўлиб боради, — дейилади хабарда.
Изоҳ (0)