AQSH harbiy-havo kuchlari NATOning alyans sharqiy qanotini havodan qamrab olish missiyasini qo‘llab-quvvatlash maqsadida Polshaga beshinchi avlod Boeing F-22 Raptor qiruvchi samolyotlarini yubormoqda, deya ma’lum qildi Yevropadagi harbiy-havo kuchlari rasmiylari. Bu haqda Pentagonning Stars and Stripes idoraviy nashri xabar bermoqda.
Vashington ma’lumotlariga ko‘ra, Alyaskada joylashgan 90-ekspeditsiya otryadining jangchilari o‘tgan kechada Angliyadagi Leykenxit harbiy-havo kuchlari bazasiga yetib kelgan. Keyinroq ular “alyansning sharqiy qanotida Rossiya agressiyasini to‘xtatish missiyasi”ni kuchaytirish maqsadida Polshaning Lask shahri yaqinidagi 32-taktik aviabazaga joylashtiriladi.
F-22 Raptor dushman samolyotlariga qarshi kurashish, qo‘shinlar va orqa obyektlarni havo hujumlaridan himoya qilish va dushman havo razvedkasiga qarshi turish uchun mo‘ljallangan.
Rossiyaning Ukrainadagi bosqini boshlanishi fonida NATO alyansning sharqiy qanotini mustahkamlash imkoniyatlari haqida bir necha bor bayonot bergan. Iyun oyi oxirida NATO Bosh kotibi Yens Stoltenberg kelasi yilgacha blokning javob kuchlari soni 40 mingdan 300 ming kishigacha oshirilishini e’lon qildi. Unga ko‘ra, zarur hollarda kuchlarni joylashtirishni tezlashtirish uchun jangovar guruhlarni ko‘paytirish va oldinga siljish pozitsiyalarida harbiy texnikani joylashtirish ham rejalashtirilgan.
Keyinchalik, Madridda bo‘lib o‘tgan NATO sammitida, boshqa qarorlar qatorida, alyansga a’zo davlatlar yangi strategik konsepsiyani qabul qildi, unda Rossiya xavfsizlikka asosiy tahdid sifatida qay etilgan.
Izoh (0)