AQSH okrug sudyasi Pol Magnuson Minnesota shtatining Sent-Pol shahrida bo‘lib o‘tgan sud majlisida Minneapolisning ikki sobiq politsiyachisi Tu Tao va Aleksandr Kyengga hukm o‘qidi. Ular 2020-yilning may oyida afroamerikalik Jorj Floydning o‘ldirilishiga aloqador deb topildi, deya xabar bermoqda Reuters.
36 yoshli Tao uch yarim yilga, 28 yoshli Kyeng esa uch yilga ozodlikdan mahrum etildi, dedi Minnesota prokurori Endryu Luger.
Fevral oyida hakamlar hay’ati Tao, Kyeng va yana bir sobiq politsiyachi, 39 yoshli Tomas Leynni Floydning konstitutsiyaviy huquqlarini buzganlikda, ya’ni politsiya xodimi Derek Shovin afroamerikalikni to‘qqiz daqiqa davomida tiz cho‘ktirib, bo‘ynidan bosib turganda unga yordam ko‘rsatmaganlikda aybdor deb topdi. Prokuratura ma’lumotlariga ko‘ra, bu vaqtda Kyeng Floydning oyoqlarini tizzasi bilan sakkiz daqiqa ushlab turgan.
21-iyul kuni sud Tomas Leynni ikki yarim yillik qamoq jazosiga hukm qildi.
2021-yil iyun oyida sud sobiq politsiyachi Derek Shovinga hukm chiqargan edi, u Jorj Floydning o‘ldirilishida aybdor deb topildi. Unga 252 oy (21 yil) qamoq jazosi tayinlangan, biroq sud uning hibsda o‘tkazgan yetti oyini hisobga olgan. Shunday qilib, ushbu hukmga ko‘ra, Shovin 20 yil-u besh oyni qamoqda o‘tkazadi. 2022-yil iyul oyida Shovin Floydning konstitutsiyaviy huquqlarini buzganlikda ayblanib, 21 yilga qamalgan edi. Ikkala hukm ham bir vaqtda ijro etiladi.
Jorj Floyd 2020-yil 25-may kuni Minneapolisda politsiya tomonidan hibsga olinganidan keyin vafot etdi. Floydning o‘limi irqiy diskriminatsiyaga qarshi Black Lives Matter nomi bilan tanilgan ommaviy norozilikni keltirib chiqardi. Namoyishlar ayrim hollarda tartibsizliklar va politsiya bilan to‘qnashuvlarga aylanib ketdi.
Izoh (0)