28-iyul kuni AQSHda Respublikachilar va Demokratik partiyalarning o‘nlab sobiq amaldorlari tomonidan yaratilgan yangi “Oldinga harakat” (Forward) partiyasi ish boshlaydi.
Unga Demokratik partiyadan prezidentlikka sobiq nomzod Endryu Yang va Nyu-Jersi sobiq gubernatori (Respublikachilar partiyasidan) Kristin Todd Uitman rahbarlik qiladi.
Ular markazchi “Oldinga harakat” partiyasi AQSHning ikkita asosiy partiyasiga munosib muqobil bo‘lishiga umid qilmoqda. Ularning ta’kidlashicha, partiya Amerikaning “muvaffaqiyatsiz ikki partiyali tizimi”dan xavotirga tushgan saylovchilarga murojaat qiladi. Hammuassislar 2021-yili Gallup so‘roviga ishora qildi — unda amerikaliklarning uchdan ikki qismi AQSH siyosiy tizimida uchinchi partiya zarur, degan fikrni bildirgandi.
Partiya o‘ziga a’zolar jalb etish maqsadida joriy yilning kuzida yigirmaga yaqin tadbir o‘tkazishni rejalashtirmoqda. Ishga rasman 24-sentabr kuni Xyustonda start beriladi, birinchi to‘liq tarkibdagi yig‘ilish esa kelasi yozda bo‘lib o‘tadi.
Reuters xabariga ko‘ra, yangi partiyaning shiori shunday bo‘ladi: “Chapga emas. O‘ngga emas. Oldinga harakat” (Not Left. Not Right. Forward).
AQSH siyosati an’anaviy ravishda ikkita asosiy partiya — Respublikachilar va Demokratlar tomonidan belgilanadi. Bu partiyalardan nomzodlar 1852-yildan beri prezidentlik saylovlarida g‘alaba qozonib kelmoqda (faqat 1848-yilda “Vigi” partiyasidan Zakari Teylor prezident bo‘lgan; bu partiyadan boshqa hech kim saylovlarda g‘olib chiqmagan).
Ikki asosiy partiyadan tashqari, Qo‘shma Shtatlarda “uchinchi partiyalar” deb ataladigan deyarli 40 ta kichik partiyalar mavjud, ammo ular siyosatga sezilarli ta’sir ko‘rsatmaydi.
Izoh (0)