Andijon viloyati Andijon shahrida 20-iyul kuni tug‘uruqxonada janjal ko‘targan erkak ushlandi. Bu haqda Milliy gvardiya xabar qildi.
Qayd etilishicha, 20-iyul kuni soat 15:44 da Andijon shahar qo‘riqlash bo‘limiga xodimlar tomonidan qo‘riqlanayotgan Chorguzar ko‘chasi 12-uyda joylashgan 2-sonli tug‘uruqxonadan xabar kelib tushgan.
Unga ko‘ra, tezkor guruh xodimlari tug‘uruqxonaga yetib borganida Asaka shahrida yashovchi fuqaro R.D (1978-yilda tug‘ilgan) muassasa bosh shifokori Q.S.ning xizmat xonasiga kirib, eshikni ichki qismidan qulflab olgan holda, tug‘uruq vaqtida vafot etgan farzandining o‘limida shifokorlarni ayblab, uni o‘ldirish bilan tahdid qilayotgani ma’lum bo‘lgan.
Xodimlar huquqbuzardan eshikni ochishni so‘raganda u prokurorni chaqirishni talab qilgan.
Voqea joyiga Andijon shahar IIO va FMB rahbarlari, Andijon shahar prokurori yetib kelib, fuqaro R.D.ni eshikni ochishga ko‘ndirgan. Xodimlar xonaga kirganda huquqbuzarning yonida o‘tkir tig‘li pichoqlar va shurup qotirish uskunasi borligi aniqlangan.
Ushbu hodisa oqibatida tan jarohati olganlar yo‘q. Mazkur holat yuzasidan dastlabki surishtiruv ishlari Andijon shahar IIB tomonidan olib borilmoqda.
Mavzuga doir:
- Samarqandda tug‘uruqxonada mast holda shovqin ko‘targan shaxslarni tartibga chaqirgan shifokor kaltaklandi
- Andijonda mast holda tez yordam shifokorini do‘pposlab, og‘ir tan jarohati yetkazgan fuqaro qamoqqa olindi
- Farg‘onadagi tug‘ruqxonada shifokorning sochidan tortib sudragan shaxs ushlanib, jinoyat ishi qo‘zg‘atildi
Izoh (0)