Sog‘liqni saqlash vazirligi tomonidan 23-iyuldan 26-iyulgacha Andijon viloyatida o‘tkazilgan sog‘lomlashtirish aksiyasida respublika hamda viloyatdagi mutaxassislar tomonidan 20 ming nafardan ortiq fuqarolar chuqurlashtirilgan tibbiy ko‘rikdan o‘tkazildi. Bu haqda “Daryo” muxbiri Umidjon Mamarasulov xabar bermoqda.
Viloyat sog‘liqni saqlash boshqarmasi axborot xizmati xodimi Mufazzalshoh Muhammadiyevning aniqlashtirishicha, o‘tgan haftada vazirlik markaziy apparati jamoasi, respublika ixtisoslashtirilgan tibbiyot markazlari rahbarlari va shifokorlari, tibbiyot oliy o‘quv yurtlari olimlaridan tashkil topgan jami 150 nafardan iborat maxsus guruh Andijon viloyatiga kelgan.
Ishchi guruh a’zolari eng chekka va olis mahallalar, hatto xonadonlargacha kirib borib, surunkali kasalliklarga chalingan va og‘ir dard tufayli qiyin ahvolda qolgan bemorlar holidan xabar olinib, ularga zarur tibbiy yordamlar ko‘rsatmoqda.
Sayyor qabul tarzida o‘tayotgan sog‘lomlashtirish tadbirlarida ishtirokchilar ro‘yxatga olinib, elektron tarzda tor soha mutaxassislari ko‘rigiga yo‘naltirilmoqda. Shundan so‘ng ular bemorlik darajasiga ko‘ra tasniflanib, ko‘rsatiladigan tibbiy xizmat hajmi tuman, viloyat va respublika miqyosida belgilab olinmoqda.
Muammoli masalalari bor fuqarolarni esa Sog‘liqni saqlash vazirligi mutasaddilari qabul qilib, murojaatlariga tezkor yechim topish choralarini ko‘rmoqda. Murakkab jarrohlik amaliyotlari talab etiladigan, biroq davolanishga imkoni yo‘q aholi vakillariga shu joyning o‘zida davlat hisobidan davolanish uchun yo‘llanmalar rasmiylashtirilmoqda.
Ma’lumotlarga ko‘ra, to‘rt kun davomida 20 ming nafarga yaqin fuqaro tibbiy ko‘rikdan o‘tkazilgan. Ularning 11 ming nafarida turli kasalliklar aniqlangan. Bemorlarning 9 ming nafari ambulator, 250 nafariga respublika, 511 nafariga viloyat hamda ming nafarga yaqiniga esa tuman miqyosidagi tibbiyot muassasalarida statsionar davolanish zarurligi bo‘yicha maslahatlar berilgan. Jumladan, Xonobod shahrida yashovchi yana bir bemor, 8 yoshli Madina Abdurahimova tez-tez sudirgi berishi sababli shifoxonada doimiy davolanishga majbur. Sayyor tibbiy ko‘rikda Madinaga Respublika Pediatriya tibbiyot instituti klinikasida davolanishi uchun bepul yo‘llanma berilgan.
“O‘ttiz uch yildan beri poliartrit va qandli diabet xastaligidan azob chekaman. Davolanish uchun barcha harakatlarni qilib ko‘rdim. Hattoki, 2014-yilda jarrohlik stoliga ham yotdim. O‘shandan keyin o‘zimni ozgina bo‘lsa-da yaxshi his qilayotgandim. Afsus xursandligim uzoqqa cho‘zilmadi. Negadir so‘nggi paytlarda kasallik yana qayta qo‘zg‘ab, zo‘rayib, salomatligim ancha og‘irlashdi. Toshkentdan shifokorlar keldi deyishganiga xursand bo‘lgandim. Biroq borolmaganim uchun xafa bo‘lib turgandim o‘zlari uyimga kirib kelishdi va tibbiy ko‘rikdan o‘tkazishdi. Shifokorlar viloyat markazida davolanishim uchun bepul yo‘llanma berishdi. Kunlar bir oz qaytib qolsa borib, tegishli muolajalarni olib kelaman”, — deydi bemor Marhabo Umaraliyeva.
Bundan tashqari, tadbir doirasida shu kunlarda viloyatdagi qator tibbiyot muassasalarida poytaxtdan kelgan malakali shifokorlar boshchiligida ko‘plab yuqori texnologiyali jarrohlik amaliyotlari ham bajarilmoqda. Respublika shoshilinch tibbiy yordam ilmiy markazi Andijon filiali hamda viloyat ko‘p tarmoqli tibbiyot markazida bir qancha og‘ir bemorlarda murakkab operatsiyalar o‘tkazilmoqda.
Izoh (0)