Жиззах шаҳрида табиий газдан ноқонуний фойдаланиш ҳолати аниқланди. Бу ҳақда Иқтисодий жиноятларга қарши курашиш департаменти хабар берди.
Таъкидланишича, Бош прокуратура ҳузуридаги департаментнинг Пахтакор тумани бўлими томонидан терговга қадар текширув ўтказилган. Унда «Ж.Т.» МЧЖга қарашли Жиззах шаҳрида жойлашган ғишт ишлаб чиқариш цехи 471,6 миллион сўм қарздорлиги сабабли табиий газ тармоғидан узилган бўлса-да, корхонанинг масъул шахслари аҳоли учун ўтказилган ўрта босимли табиий газ тармоғига ноқонуний улангани аниқланди.
Шунингдек, қўлбола усулда тайёрланган горелкалардан фойдаланиб келгани оқибатида давлат ва жамият манфаатларига 272,3 миллион сўм зарар етказилгани маълум бўлди.
Мазкур ҳолат юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)