Joriy yilning 26-iyuliga qadar I. M. Gubkin nomidagi Rossiya davlat neft va gaz universiteti Toshkent filialining 3-kurs talabalari ERIELL Group obyektlarida o‘quv-ishlab chiqarish amaliyotini muvaffaqiyatli yakunladi.
Gubkin universitetining talabalari bo‘lajak kasbning o‘ziga xos xususiyatlari bilan amalda tanishish imkoniyatidan 2017-yildan beri foydalanib kelmoqda. E’tiborli jihati, talabalar uchun haqiqiy burg‘ilash uskunasida amaliyot o‘tash imkoniyatini beruvchi butun boshli tizim ishlab chiqilgan.
Gap shundaki, burg‘ilash jarayoni amalga oshiriladigan sanoat uchastkalari xavfli ishlab chiqarish obyektlari toifasiga kiradi, ya’ni maxsus tayyorgarlik va malakaga ega bo‘lmagan shaxslar obyekt hududiga kiritilmaydi.
Shuning uchun Gubkin universiteti talabalariga omad kulib boqqan deb aytish mumkin. O‘tgan yilning yozida ikkinchi kursdan so‘ng ushbu talabalar uchun kompaniyalar guruhi tomonidan “Qarshi” ishlab chiqarishni ta’minlash bazasi negizida ishlab chiqarish amaliyoti tashkil etilgan. Mashg‘ulotlar mutaxassislarni tayyorlash uchun maxsus uskunalar bilan jihozlangan va o‘zining o‘quv poligoniga ega ERIELL Prof Education korporativ o‘quv markazida o‘tkazilgan.
Bir yil avval o‘quv amaliyotini muvaffaqiyatli tamomlagan va “burg‘ilovchi yordamchisi” ishchi kasbi bo‘yicha sertifikat olgan ikkinchi kurs talabalariga burg‘ilash uskunasida ishlash imkoniyati taqdim etildi. ERIELL Prof Education bir qator mutaxassisliklar bo‘yicha dars berish litsenziyasiga ega. ERIELL o‘quv markazi tomonidan ishchi kasbi bo‘yicha amaliyotchi talabalarni tayyorlash va imtihondan o‘tkazish bepul amalga oshiriladi.
Bundan tashqari, so‘nggi yillardagi sanitariya-epidemiya holatining o‘ziga xos xususiyatlari hamda burg‘ilash qurilmalaridagi og‘ir iqlim sharoiti, yozda kuzatilayotgan yuqori haroratlarni hisobga olib, talabalarni amaliyotga qabul qilish uchun tibbiy ko‘rikdan o‘tishi va PZR test topshirishi talab qilindi. Kompaniyalar guruhi tomonidan universitet ma’muriyati bilan birgalikda tashkil etilgan, barcha bosqichlardan o‘tgandan keyingina amaliyotchilar o‘z kasbini haqiqiy sharoitlarda egallash imkoniyatiga ega bo‘lishdi.
“Bir necha yillar davomida ta’lim muassasamiz va ERIELL Group o‘rtasida talabalar uchun amaliyot tashkil etish va o‘tkazish bo‘yicha yaqin hamkorlik aloqalari yo‘lga qo‘yilgan. Shu bilan birga, neft va gaz quduqlarini burg‘ilash yo‘nalishi bo‘yicha ta’lim olayotgan talabalarga quduqlarni burg‘ilash, qayta ishlash va o‘zlashtirish jarayonlarini kuzatish, ishlab chiqarish obyektlariga tashrif buyurish uchun ‘burg‘ilovchi yordamchisi’ ishchi kasbini o‘rganish imkoniyati taqdim etildi. O‘quvchilarning ishlab chiqarish korxonalarida amaliyot o‘tashi ularning nazariy bilimlarini chuqurlashtirish, ko‘nikma va tajribalarini orttirishda qo‘l kelmoqda, bu esa o‘quv jarayoni sifati va saviyasini oshirishga xizmat qilmoqda”, – deya ta’kidladi I. M. Gubkin nomidagi Rossiya davlat neft va gaz universitetining Toshkentdagi filiali ijrochi direktori Abdulla Magrupov.
Bu yil yozda 4 ta ERIELL ekspeditsiyasi – Surxondaryo, Qarshi, Buxoro va Gazli ekspeditsiyalari yosh neftchilarni qabul qildi. Bo‘lajak mutaxassislar orasida neft va gaz quduqlarini burg‘ilash, neft-gaz majmuasi tashkilotlari iqtisodiyoti va ishlab chiqarishni boshqarish kabi yo‘nalishlar talabalarini ham uchratish mumkin.
“Bizning hamkorligimiz 5 yildan ortiq vaqtdan beri davom etmoqda va shu vaqt ichida ERIELL Group rahbariyati va Gubkin nomidagi Rossiya davlat universiteti filiali o‘rtasida to‘liq kelishuvga erishildi. Ta’kidlab o‘tish lozimki, amaliyot jarayonini tashkil etishning aniq mexanizmini yo‘lga qo‘yish katta tayyorgarlik ishlarini va jiddiy e’tiborni talab qiladi. Universitet tomonidan kurator tayinlandi, biz tomondan tajribali mutaxassislar talabalarga biriktirildi, mutaxassisliklar bo‘yicha batafsil amaliyot dasturi ishlab chiqildi. Shuningdek, ularning yashashi va ovqatlanishi, hordiq chiqarishi, bo‘sh vaqtini mazmunli o‘tkazishi, jumladan, sport bilan shug‘ullanishi, o‘zini kasbga tayyorlashi uchun barcha zarur sharoitlar belgilab berildi va tayyorlandi”, – dedi ERIELL Group vakolatxonasi rahbari o‘rinbosari Alim Yunusov.
Talabalarning amaliyoti 29-iyun kuni mehnatni muhofaza qilish, sanoat xavfsizligi, ichki tartib qoidalarining sohaga oid va korporativ talablarini o‘rganish, talabalar tomonidan ular qay darajada o‘zlashtirilganligini tekshirishdan boshlandi. Amaliyot davrida talabalar kombinezon va shaxsiy himoya vositalari bilan ta’minlandi.
Shuningdek, burg‘ilash uskunasida amaliyot o‘tayotgan barcha talabalar smena ishchilari bilan birga kunda ikki marta zarur bo‘lgan barcha jihozlarga ega tibbiyot markazlarida rejali tibbiy ko‘rikdan o‘tkazildi.
“Tashkil etilgan amaliyot o‘qishni tamomlaganimizdan so‘ng ERIELL Group kompaniyasida burg‘ilash bo‘yicha muhandis sifatida faoliyatimizni davom ettirish istagini kuchaytirdi”, – deydi shu kunlarda quduqlarni burg‘ilash jarayonini kuzatgan talabalar A. Rahimov va S. Hikmatovlar. Ular burg‘ilash eritmasini tayyorlashda ishtirok etishdi va burg‘ilash uskunasini o‘rganishdi.
Kompaniyada amaliyot o‘tayotgan I. Qurbonov va S. Tohirov o‘z kelajagini burg‘ilash sohasi bilan bilan bo‘g‘lash va kelajakda kompaniyalar guruhida ishlash istagida. “Menga burg‘ilash brigadasining va biriktirilgan murabbiylarning do‘stona munosabati va e’tiborliligi juda yoqdi”, — dedi yigitlar.
Boshqa ishtirokchilar, jumladan, A. Muxitdinov, E. Shevchenko, R. Bikchantayev, U. Karimovlar ushbu amaliyot ta’lim jarayonining muhim qismi ekanligini ta’kidlab o‘tishdi. Yoshlarning fikriga ko‘ra, burg‘ilash uchastkasida o‘tkazilgan amaliyot kasbga oid amaliy bilim va ko‘nikmalarga ega bo‘lish imkonini beradi.
ERIELL Group va Gubkin nomidagi Rossiya davlat universiteti filiali o‘rtasidagi hamkorlik davomida aniq bo‘ldiki, haqiqiy burg‘ilash sharoitida ishlash tajribasi talabalarni kasbga tayyorlash uchun muhim hisoblanadi, mehnat bozorida talab katta bo‘lgan va kerakli kasbni tanlaganini tushunishga yordam beradi. Mamlakatimiz neft va gaz sanoati bugungi kunda yetakchi mavqega ega va jadal rivojlanmoqda. Mamlakatimizda ishlab chiqarilayotgan neft va gaz yuqori qo‘shimcha qiymatli mahsulotlar ishlab chiqarish asosiga aylanmoqda, buning uchun mamlakatimizda innovatsion ishlab chiqarish quvvatlari barpo etilmoqda. Demak, malakali kadrlarga bo‘lgan ehtiyoj ortib bormoqda.
Qo‘shimcha sifatida aytishimiz mumkinki, O‘zbekiston Prezidentining 2019-yil oktabrda qabul qilingan qarori bilan tasdiqlangan “Oliy ta’lim tizimini 2030-yilgacha rivojlantirish konsepsiyasi”da yuqori malakali mutaxassislar tayyorlash jarayoniga buyurtmachilarni faol jalb etish nazarda tutilgan.
Hujjatda asosiy e’tibor o‘quv jarayoniga tajribali amaliyotchilarni faol jalb etish, ishlab chiqarish infratuzilmasi va ta’limda amaliy misollardan keng foydalanishga qaratilgan bo‘lib, ushbu tamoyil ERIELL Group tomonidan talabalar uchun amaliyot tashkil etishda amalda tatbiq etiladi.
Reklama huquqi asosida.
Izoh (0)