Жорий йилнинг 26 июлига қадар И. М. Губкин номидаги Россия давлат нефть ва газ университети Тошкент филиалининг 3-курс талабалари ERIELL Group объектларида ўқув-ишлаб чиқариш амалиётини муваффақиятли якунлади.
Губкин университетининг талабалари бўлажак касбнинг ўзига хос хусусиятлари билан амалда танишиш имкониятидан 2017 йилдан бери фойдаланиб келмоқда. Эътиборли жиҳати, талабалар учун ҳақиқий бурғилаш ускунасида амалиёт ўташ имкониятини берувчи бутун бошли тизим ишлаб чиқилган.
Гап шундаки, бурғилаш жараёни амалга ошириладиган саноат участкалари хавфли ишлаб чиқариш объектлари тоифасига киради, яъни махсус тайёргарлик ва малакага эга бўлмаган шахслар объект ҳудудига киритилмайди.
Шунинг учун Губкин университети талабаларига омад кулиб боққан деб айтиш мумкин. Ўтган йилнинг ёзида иккинчи курсдан сўнг ушбу талабалар учун компаниялар гуруҳи томонидан «Қарши» ишлаб чиқаришни таъминлаш базаси негизида ишлаб чиқариш амалиёти ташкил этилган. Машғулотлар мутахассисларни тайёрлаш учун махсус ускуналар билан жиҳозланган ва ўзининг ўқув полигонига эга ERIELL Prof Education корпоратив ўқув марказида ўтказилган.
Бир йил аввал ўқув амалиётини муваффақиятли тамомлаган ва «бурғиловчи ёрдамчиси» ишчи касби бўйича сертификат олган иккинчи курс талабаларига бурғилаш ускунасида ишлаш имконияти тақдим этилди. ERIELL Prof Education бир қатор мутахассисликлар бўйича дарс бериш лицензиясига эга. ERIELL ўқув маркази томонидан ишчи касби бўйича амалиётчи талабаларни тайёрлаш ва имтиҳондан ўтказиш бепул амалга оширилади.
Бундан ташқари, сўнгги йиллардаги санитария-эпидемия ҳолатининг ўзига хос хусусиятлари ҳамда бурғилаш қурилмаларидаги оғир иқлим шароити, ёзда кузатилаётган юқори ҳароратларни ҳисобга олиб, талабаларни амалиётга қабул қилиш учун тиббий кўрикдан ўтиши ва ПЗР тест топшириши талаб қилинди. Компаниялар гуруҳи томонидан университет маъмурияти билан биргаликда ташкил этилган, барча босқичлардан ўтгандан кейингина амалиётчилар ўз касбини ҳақиқий шароитларда эгаллаш имкониятига эга бўлишди.
«Бир неча йиллар давомида таълим муассасамиз ва ERIELL Group ўртасида талабалар учун амалиёт ташкил этиш ва ўтказиш бўйича яқин ҳамкорлик алоқалари йўлга қўйилган. Шу билан бирга, нефть ва газ қудуқларини бурғилаш йўналиши бўйича таълим олаётган талабаларга қудуқларни бурғилаш, қайта ишлаш ва ўзлаштириш жараёнларини кузатиш, ишлаб чиқариш объектларига ташриф буюриш учун ‘бурғиловчи ёрдамчиси’ ишчи касбини ўрганиш имконияти тақдим этилди. Ўқувчиларнинг ишлаб чиқариш корхоналарида амалиёт ўташи уларнинг назарий билимларини чуқурлаштириш, кўникма ва тажрибаларини орттиришда қўл келмоқда, бу эса ўқув жараёни сифати ва савиясини оширишга хизмат қилмоқда», – дея таъкидлади И. М. Губкин номидаги Россия давлат нефть ва газ университетининг Тошкентдаги филиали ижрочи директори Абдулла Магрупов.
Бу йил ёзда 4 та ERIELL экспедицияси – Сурхондарё, Қарши, Бухоро ва Газли экспедициялари ёш нефтчиларни қабул қилди. Бўлажак мутахассислар орасида нефть ва газ қудуқларини бурғилаш, нефть-газ мажмуаси ташкилотлари иқтисодиёти ва ишлаб чиқаришни бошқариш каби йўналишлар талабаларини ҳам учратиш мумкин.
«Бизнинг ҳамкорлигимиз 5 йилдан ортиқ вақтдан бери давом этмоқда ва шу вақт ичида ERIELL Group раҳбарияти ва Губкин номидаги Россия давлат университети филиали ўртасида тўлиқ келишувга эришилди. Таъкидлаб ўтиш лозимки, амалиёт жараёнини ташкил этишнинг аниқ механизмини йўлга қўйиш катта тайёргарлик ишларини ва жиддий эътиборни талаб қилади. Университет томонидан куратор тайинланди, биз томондан тажрибали мутахассислар талабаларга бириктирилди, мутахассисликлар бўйича батафсил амалиёт дастури ишлаб чиқилди. Шунингдек, уларнинг яшаши ва овқатланиши, ҳордиқ чиқариши, бўш вақтини мазмунли ўтказиши, жумладан, спорт билан шуғулланиши, ўзини касбга тайёрлаши учун барча зарур шароитлар белгилаб берилди ва тайёрланди», – деди ERIELL Group ваколатхонаси раҳбари ўринбосари Алим Юнусов.
Талабаларнинг амалиёти 29 июнь куни меҳнатни муҳофаза қилиш, саноат хавфсизлиги, ички тартиб қоидаларининг соҳага оид ва корпоратив талабларини ўрганиш, талабалар томонидан улар қай даражада ўзлаштирилганлигини текширишдан бошланди. Амалиёт даврида талабалар комбинезон ва шахсий ҳимоя воситалари билан таъминланди.
Шунингдек, бурғилаш ускунасида амалиёт ўтаётган барча талабалар смена ишчилари билан бирга кунда икки марта зарур бўлган барча жиҳозларга эга тиббиёт марказларида режали тиббий кўрикдан ўтказилди.
«Ташкил этилган амалиёт ўқишни тамомлаганимиздан сўнг ERIELL Group компаниясида бурғилаш бўйича муҳандис сифатида фаолиятимизни давом эттириш истагини кучайтирди», – дейди шу кунларда қудуқларни бурғилаш жараёнини кузатган талабалар А. Раҳимов ва С. Ҳикматовлар. Улар бурғилаш эритмасини тайёрлашда иштирок этишди ва бурғилаш ускунасини ўрганишди.
Компанияда амалиёт ўтаётган И. Қурбонов ва С. Тоҳиров ўз келажагини бурғилаш соҳаси билан билан бўғлаш ва келажакда компаниялар гуруҳида ишлаш истагида. «Менга бурғилаш бригадасининг ва бириктирилган мураббийларнинг дўстона муносабати ва эътиборлилиги жуда ёқди», — деди йигитлар.
Бошқа иштирокчилар, жумладан, А. Мухитдинов, Э. Шевченко, Р. Бикчантаев, У. Каримовлар ушбу амалиёт таълим жараёнининг муҳим қисми эканлигини таъкидлаб ўтишди. Ёшларнинг фикрига кўра, бурғилаш участкасида ўтказилган амалиёт касбга оид амалий билим ва кўникмаларга эга бўлиш имконини беради.
ERIELL Group ва Губкин номидаги Россия давлат университети филиали ўртасидаги ҳамкорлик давомида аниқ бўлдики, ҳақиқий бурғилаш шароитида ишлаш тажрибаси талабаларни касбга тайёрлаш учун муҳим ҳисобланади, меҳнат бозорида талаб катта бўлган ва керакли касбни танлаганини тушунишга ёрдам беради. Мамлакатимиз нефть ва газ саноати бугунги кунда етакчи мавқега эга ва жадал ривожланмоқда. Мамлакатимизда ишлаб чиқарилаётган нефть ва газ юқори қўшимча қийматли маҳсулотлар ишлаб чиқариш асосига айланмоқда, бунинг учун мамлакатимизда инновацион ишлаб чиқариш қувватлари барпо этилмоқда. Демак, малакали кадрларга бўлган эҳтиёж ортиб бормоқда.
Қўшимча сифатида айтишимиз мумкинки, Ўзбекистон Президентининг 2019 йил октябрда қабул қилинган қарори билан тасдиқланган «Олий таълим тизимини 2030 йилгача ривожлантириш концепцияси»да юқори малакали мутахассислар тайёрлаш жараёнига буюртмачиларни фаол жалб этиш назарда тутилган.
Ҳужжатда асосий эътибор ўқув жараёнига тажрибали амалиётчиларни фаол жалб этиш, ишлаб чиқариш инфратузилмаси ва таълимда амалий мисоллардан кенг фойдаланишга қаратилган бўлиб, ушбу тамойил ERIELL Group томонидан талабалар учун амалиёт ташкил этишда амалда татбиқ этилади.
Реклама ҳуқуқи асосида.
Изоҳ (0)