Innovatsion rivojlanish vazirligi Innovatsiyalar milliy ofisi tomonidan tashkillashtirilayotgan InnoWeek–2022 innovatsion g‘oyalar hududiy ko‘rgazmasi butun respublika bo‘ylab o‘tkazilmoqda. Bu esa, albatta, respublikadagi tadbirkorlar va yosh startap egalari uchun katta imkoniyatlarni yaratib bermoqda.
Xususan, 20—21-iyul kunlari Namangan viloyatida InnoWeek–2022 innovatsion g‘oyalar ko‘rgazmasi tashkil etildi hamda ko‘rgazma doirasida iqtidorli yoshlarni qo‘llab-quvvatlash bo‘yicha TechnoWays texnologik rivojlanish marafoni o‘tkazildi. Ko‘rgazmaning tantanali ochilish marosimi Namangan viloyati madaniyat markazi binosida bo‘lib o‘tdi.
Ko‘rgazmada 107 turdagi tekstil, oziq-ovqat, qurilish materiallari, elektrotexnika, charm-sanoat, farmatsevtika, robototexnika kabi yo‘nalishlardagi innovatsion ishlanmalar va mahsulotlar namoyish etildi. Shundan Namangan viloyatidagi oliy ta’lim muassasalarining 60 nafar ishtirokchilari tomonidan 72 turdagi va 31 ta tadbirkorlik subyektlari tomonidan 35 turdagi mahsulotlar namoyish etildi.
Shuningdek, ko‘rgazma doirasida iqtidorli yoshlarni qo‘llab-quvvatlash maqsadida tashkil etilgan TechnoWays texnologik rivojlanish marafonida jami 53 nafar iqtidorli yoshlar o‘zlarining innovatsion g‘oyalari va ishlanmalari bilan ishtirok etishdi. Ishtirokchilarga o‘quv seminarlari, texnologik turlar tashkillashtirildi. Eng yaxshi loyihaga ega 3 ta ishtirokchi saralab olinib rag‘batlantirildi.
Bundan tashqari, ko‘rgazma doirasida Namangan viloyatidagi Nam Smart Service Oil MChJ va Qirg‘iziston Respublikasining OsOO “MasMet” o‘rtasida import o‘rnini bosuvchi innovatsion mahsulotlar — avtomobil dvigatellari yetkazib berish bo‘yicha eksport shartnomasi, shuningdek, TM Fish Fresh MChJ va “Birja Ta’minot” MChJ o‘rtasida baliq-farsh mahsulotlarini yetkazib berish bo‘yicha 450,0 million so‘mlik shartnoma imzolandi.
Tadbirdan ko‘zlangan asosiy maqsad, tadbirkorlarni, ishbilarmon va yosh olimlarni, startap egalarini bitta maydonga to‘plash, ular uchun imkoniyatlar yaratish, loyihalarni rivojlantirishda ko‘makchi bo‘lish edi va bu juda yaxshi uddalandi. Yaqin kunlarda qolgan hududlardan ham katta natijalarni kutib qolamiz.
Ko‘rgazmadan asosiy maqsad, xalqaro bozorda har bir loyihaning potensial xaridorini topishdir. Shu sababli barcha loyihalar, har bir hududning o‘zida alohida ko‘rib chiqilib, saralab olinmoqda.
Reklama huquqi asosida.
Izoh (0)