Самарқанд вилояти Самарқанд туманида 18 июль куни учта машина иштирокида йўл-транспорт ҳодисаси содир бўлди. Бу ҳақда вилоят Ички ишлар бошқармаси хабар қилди.
Қайд этилишича, ҳолат шу куни соат 23:00 ларда А-378 автомобиль йўлининг Самарқанд тумани ҳудудидан ўтуви 12-километрида юз берган. Қайрилиб олаётган Lacetti машинасига Қашқадарё вилоятидан ҳаракатланиб келаётган Isuzu юк машинаси келиб урилган ва уни қарама-қарши йўналишга ўтказиб юборган.
Шу пайт рўпарадан келаётган «КамАЗ» юк машинаси Lacetti машинасига урилган ва уни суриб кетиб, йўлни ажратиб турувчи бетон тўсиқ устига чиқиб кетган. Lacetti эса унинг остида қолган.
ЙТҲ оқибатида Lacetti ҳайдовчиси оғир тан жароҳатлари олиб, воқеа жойида ҳалок бўлган. «КамАЗ» ва Isuzu ҳайдовчилари ҳам турли даражада тан жароҳатлари билан шифохонага ётқизилган.
Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)