Joriy yilning birinchi choragida O‘zbekistonga 50 mingdan ortiq rossiyalik kelgan. Bu haqda Rossiyaning “Kommersant” sayti xabar qildi. Quyida ana shu saytda e’lon qilingan maqola bilan tanishishingiz mumkin.
Taqqoslash uchun: 2021- yilda Rossiyadan O‘zbekistonga kelganlar soni 3,5 baravar kam edi.
O‘zbekistonga kelishingiz bilan tezda PINFL (Jismoniy shaxslarning shaxsiy identifikatsion raqami) olish maqsadga muvofiq — bu davlat, bank va ijtimoiy xizmatlar ko‘rsatishda shaxsni tasdiqlovchi yagona identifikatordir.
Respublikada rasman ishlashi uchun ham kerak. So‘nggi bir necha yil ichida mamlakat “Biznes yuritish” reytingida sezilarli darajada ko‘tarilib, yuridik shaxslarni ro‘yxatdan o‘tkazish qulayligi bo‘yicha top-10 ta davlat qatoridan joy oldi.
“Kvartira topishning eng oson yo‘li mahalliy e’lonlar orqali qidirish bo‘lib, Toshkent markazidagi o‘rtacha ikki xonalik uyning ijara narxi 500 AQSH dollari atrofida”, — deydi ingliz tili o‘qituvchisi Aleksandr. “Mahalliy aholi uchun narxlar har doim biroz pastroq bo‘lgan. Lekin uy-joy topish juda oson. Bu yerda “Avito” kabi saytlar mavjud. Toshkentdagi kvartiralar narxi O‘zbekistonning boshqa shaharlariga qaraganda ikki baravar qimmatroq bo‘lsa kerak. Ikki xonali kvartirani ijaraga 300-500 AQSH dollariga topish mumkin. Tabiiyki, qimmatroq turadigan elita kvartiralar ham bor.
Ko‘pchilik rossiyaliklar O‘zbekistonga mahalliy bank kartasi olish uchun bir necha kunga kelishadi. Kartani olish oson, lekin filiallarda ko‘p soatlik navbatlar ham uchraydi, deydi moliya menejeri Jargal Gatapov: “O‘zbekistonda bank sektori Rossiyanikidan ancha orqada – taxminan 10-15 yilga. Masalan, Kapitalbankda ikki soat navbatda turish mumkin. Bankomatlarning rivojlangan tarmog‘i yo‘q, ya’ni pul yechib olish uchun komissiya olinadi”.
O‘zbekistonda juda keng tarqalgan muammolardan biri — elektr ta’minotidagi tez-tez uzilishlar. Masofadan turib ishlaydigan “Kommersant” suhbatdoshlari bunday paytlarda mobil internet, powerbank va noutbukdan foydalanishlarini ma’lum qilishgan. “O‘zbeklarning katta qismi rus tilini yaxshi biladi va madaniyatlararo muloqotda hech qanday qiyinchilik yo‘q”, — deydi Yevgeniy. U oilasi bilan Krasnodardan mamlakatning uchinchi yirik shahri bo‘lgan Samarqandga ko‘chib kelgan.
“Bu yerda Krasnodar mahsulotlari juda ko‘p. Do‘konlarda Krasnodar muzqaymoqlari ‘Korovka’, quyultirilgan sut, ‘Prostokvashino’ sut mahsulotlari, rus tilida narx belgilari mavjud. Biz Samarqandning kichik ko‘chalari bo‘ylab sayr qildik — bu turistik hududlar emasdi, o‘rindiqlarda o‘tirgan qariya ayollar rus tilida gaplashishayotganiga guvoh bo‘ldik”, — deydi Yevgeniy.
O‘zbekistonga ko‘chib kelganlar yo‘llardagi betartib harakatga ko‘nikishi kerak, deydi Rossiyadan kelganlar. Ularning aytishicha, haydovchilar keskin manyovrlar qilishdan tortinishmaydi hamda burilish signalisiz birdaniga chapga burilib ketishlari mumkin. “Bu holatda eng yaxshi yo‘l – taksi xizmatidan foydalanish. Poytaxtda ham taksi ancha arzon”, — deb davom etadi Jargal Gatapov. “Shaharning bir chekkasidan ikkinchi chetiga tig‘iz paytdan tashqari vaqtda 170 rublga yetib olish mumkin. Bu taxminan 20 km lik yo‘l. Bu yerda ekonom klass Matiz yoki qandaydir eski Nexia. Spark, Cobalt’lar esa komfort hisoblanadi”.
“Bundan tashqari, O‘zbekistonda, dunyoning boshqa joylariga qaraganda, odamlar o‘rtasidagi norasmiy aloqalar ayniqsa kuchli”, — deydi Toshkentga ko‘chib kelgan Tatyana.
“Masalan, men Toshkentga ko‘chib kelganim haqida Facebook’ka yozganimda, shu zahoti menga ishonchli stomatologlar, kosmetologlar, riyeltorlar va boshqalarning telefon raqamlarini tashlab berishdi, chunki bu madaniyat. Odamlar bilan uchrashish nuqtayi nazaridan, bu sizning muammolaringizni hal qilishning eng yaxshi usuli. Biz ijarada turgan uyning egasi juda kuchli networker bo‘lib chiqdi. Har qanday masalani hal qilish uchun biz birinchi navbatda unga qo‘ng‘iroq qilamiz” — deyiladi “Kommersant”dagi maqolada.
Izoh (0)