Жорий йилнинг биринчи чорагида Ўзбекистонга 50 мингдан ортиқ россиялик келган. Бу ҳақда Россиянинг «Коммерсантъ» сайти хабар қилди. Қуйида ана шу сайтда эълон қилинган мақола билан танишишингиз мумкин.
Таққослаш учун: 2021- йилда Россиядан Ўзбекистонга келганлар сони 3,5 баравар кам эди.
Ўзбекистонга келишингиз билан тезда PINFL (Жисмоний шахсларнинг шахсий идентификацион рақами) олиш мақсадга мувофиқ — бу давлат, банк ва ижтимоий хизматлар кўрсатишда шахсни тасдиқловчи ягона идентификатордир.
Республикада расман ишлаши учун ҳам керак. Сўнгги бир неча йил ичида мамлакат «Бизнес юритиш» рейтингида сезиларли даражада кўтарилиб, юридик шахсларни рўйхатдан ўтказиш қулайлиги бўйича топ-10 та давлат қаторидан жой олди.
«Квартира топишнинг энг осон йўли маҳаллий эълонлар орқали қидириш бўлиб, Тошкент марказидаги ўртача икки хоналик уйнинг ижара нархи 500 АҚШ доллари атрофида», — дейди инглиз тили ўқитувчиси Александр. «Маҳаллий аҳоли учун нархлар ҳар доим бироз пастроқ бўлган. Лекин уй-жой топиш жуда осон. Бу ерда «Авито» каби сайтлар мавжуд. Тошкентдаги квартиралар нархи Ўзбекистоннинг бошқа шаҳарларига қараганда икки баравар қимматроқ бўлса керак. Икки хонали квартирани ижарага 300-500 АҚШ долларига топиш мумкин. Табиийки, қимматроқ турадиган элита квартиралар ҳам бор.
Кўпчилик россияликлар Ўзбекистонга маҳаллий банк картаси олиш учун бир неча кунга келишади. Картани олиш осон, лекин филиалларда кўп соатлик навбатлар ҳам учрайди, дейди молия менежери Жаргал Гатапов: «Ўзбекистонда банк сектори Россияникидан анча орқада – тахминан 10-15 йилга. Масалан, Капиталбанкда икки соат навбатда туриш мумкин. Банкоматларнинг ривожланган тармоғи йўқ, яъни пул ечиб олиш учун комиссия олинади».
Ўзбекистонда жуда кенг тарқалган муаммолардан бири — электр таъминотидаги тез-тез узилишлар. Масофадан туриб ишлайдиган «Коммерсантъ» суҳбатдошлари бундай пайтларда мобил интернет, powerbank ва ноутбукдан фойдаланишларини маълум қилишган. «Ўзбекларнинг катта қисми рус тилини яхши билади ва маданиятлараро мулоқотда ҳеч қандай қийинчилик йўқ», — дейди Евгений. У оиласи билан Краснодардан мамлакатнинг учинчи йирик шаҳри бўлган Самарқандга кўчиб келган.
«Бу ерда Краснодар маҳсулотлари жуда кўп. Дўконларда Краснодар музқаймоқлари ‘Коровка’, қуюлтирилган сут, ‘Prosтоквашинў сут маҳсулотлари, рус тилида нарх белгилари мавжуд. Биз Самарқанднинг кичик кўчалари бўйлаб сайр қилдик — бу туристик ҳудудлар эмасди, ўриндиқларда ўтирган қария аёллар рус тилида гаплашишаётганига гувоҳ бўлдик», — дейди Евгений.
Ўзбекистонга кўчиб келганлар йўллардаги бетартиб ҳаракатга кўникиши керак, дейди Россиядан келганлар. Уларнинг айтишича, ҳайдовчилар кескин манёврлар қилишдан тортинишмайди ҳамда бурилиш сигналисиз бирданига чапга бурилиб кетишлари мумкин. «Бу ҳолатда энг яхши йўл – такси хизматидан фойдаланиш. Пойтахтда ҳам такси анча арзон», — деб давом этади Жаргал Гатапов. «Шаҳарнинг бир чеккасидан иккинчи четига тиғиз пайтдан ташқари вақтда 170 рублга етиб олиш мумкин. Бу тахминан 20 км лик йўл. Бу ерда эконом класс Matiz ёки қандайдир эски Nexia. Spark, Cobalt’лар эса комфорт ҳисобланади».
«Бундан ташқари, Ўзбекистонда, дунёнинг бошқа жойларига қараганда, одамлар ўртасидаги норасмий алоқалар айниқса кучли», — дейди Тошкентга кўчиб келган Татяна.
«Масалан, мен Тошкентга кўчиб келганим ҳақида Facebook’ка ёзганимда, шу заҳоти менга ишончли стоматологлар, косметологлар, риелторлар ва бошқаларнинг телефон рақамларини ташлаб беришди, чунки бу маданият. Одамлар билан учрашиш нуқтаи назаридан, бу сизнинг муаммоларингизни ҳал қилишнинг энг яхши усули. Биз ижарада турган уйнинг эгаси жуда кучли networker бўлиб чиқди. Ҳар қандай масалани ҳал қилиш учун биз биринчи навбатда унга қўнғироқ қиламиз» — дейилади «Коммерсантъ»даги мақолада.
Изоҳ (0)