Samarqand shahrida butunjahon jamiyatining “O‘zbekiston madaniy merosi — yangi Renessans poydevori” deb nomlangan oltinchi xalqaro kongressi boshlandi. Bu haqda tadbirda qatnashgan “Daryo” muxbiri xabar berdi.

Dunyoga mashhur 250 nafardan ortiq sharqshunos olimlar, jumladan, 33 nafar mashhur xalqaro, 15 nafar milliy muzeylar direktori, 6 nafar xalqaro tashkilot vakili, 15 nafardan ortiq akademiklar, 20 nafardan ortiq professor hamda 20 nafar fan doktori ishtirok etayotgan tadbirning birinchi kunida “O‘zbekiston madaniy merosi jahon to‘plamlarida” turkumidagi 10 ta yangi kitob-albomlar taqdimoti bo‘lib o‘tgan.

Tadbir doirasida shuningdek, Fransiya milliy kutubxonasida saqlanadigan qadimiy qo‘lyozmaning noyob nashri taqdimoti ham o‘tkazilgan.

“Yevropaning yetakchi nashriyot uylaridan biri Mueller&Schindler buyuk munajjim Mirzo Ulug‘bek buyurtmasi bilan yaratilgan noyob qo‘lyozma faksimilini namoyish etdi. Shuningdek, kongress doirasida O‘zbekiston san’atiga oid yana ikkita noyob kitob ‘Orol va Amu qirg‘oqlarida. Qoraqalpoq san’ati’ hamda ‘Bezak: estetika, sehr, ma’no’ kitoblari ham taqdim etildi”, — deydi tadbir ishtirokchilaridan biri.

Kongress 24-iyulga qadar davom etadi va ikki kun davomida dunyoning 35 dan ortiq davlatidan kelgan taniqli sharqshunos olimlarning O‘zbekiston va Markaziy Osiyo mamlakatlari madaniy merosiga bag‘ishlangan 100 dan ortiq ma’ruzalari tinglanadi.