Gollivudning mashhur rejissorlaridan biri Stiven Spilberg “Mamford & Sons” guruhidagi xonanda Markus Mamfordning “Kannibal” taronasiga klip suratga oldi. Bu Spilbergning 50 yillik faoliyatidagi birinchi klipi hisoblanadi.
Suratga olish ishlari 3-iyul kuni Nyu-Yorkdagi maktablardan birining sport zalida bo‘lib o‘tdi. Spilberg klipni o‘zining iPhone’nida, qora va oq rangdagi bir kadrda suratga oldi. Mamfordning rafiqasi aktrisa Keri Malligan kostyumlar va ovozlar ustida ishlagan.
Uch karra “Oskar” sohibi bo‘lgan Spilbergning navbatdagi namoyish etilishi kutilayotgan kinokartinasi “Fabelmanlar” avtobiografik filmi hisoblanadi. Ushbu film AQShda joriy yilning 11-noyabrida katta ekranlarga chiqadi. Rejissorning bolalik va o‘smirlik yillari haqidagi filmda bosh rollarni Mishel Uilyams, Pol Dano, Set Rogen va Devid Linch ijro etgan.
Ma’lumot uchun, Stiven Spilberg 1946-yil 18-dekabrda AQShning Ogayo shtatida tug‘ilgan. Keyinchalik u Kaliforniya shtatiga ko‘chib o‘tadi va shu yerdagi kollejda tahsil oladi. Stiven rejissorlikdan tashqari prodyuser va ssenariy muallifi sifatida ham tanilgan. Rejissor bir qancha xalqaro mukofotlarga sazovor bo‘lgan. Time jurnali uni 2013-yilda asrning eng muhim 100 kishisi qatoriga kiritdi. Stiven suratga olgan “Yura olamiga sayohat”, “Josuslik ko‘prigi”, “Linkoln”, “Myunxen” kabi kinokartinalar dunyo bo‘ylab mashhurlikka erishdi.
Izoh (0)