O‘zbek san’atidagi bo‘ydoqlar nega oila qurishga shoshilishmayotgani, orzusidagi rafiqa qanday bo‘lishi va to‘ylariga nimalar “xalal” berayotgani haqida bilishni istaysizmi? Marhamat, quyidagi savollarga ulardan qisqacha javob oling.
Dilshodbek Kattabekov — 31 yoshda
Bolaligidayoq “Kichkina tabib” filmidagi roli bilan tomoshabinlar mehrini qozongan Dilshodbek Kattabekov ham ancha ulg‘ayib qoldi. U yoshini sir tutsa-da, 30 yoshni qarshilagani aniq. Afsuski, bu ijodkor haligacha bo‘ydoqlar safini tark etgani yo‘q. U 2018-yildagi intervyularida uylanish uchun yaxshi qiz izlayotganini ma’lum qilgandi.
— Nasib qilgan inson bilan oila quraman. Ko‘pchilik qizlar yoki ularning ota-onalari san’atkorlar haqida noto‘g‘ri fikrda. San’atkor ham oddiy inson, u to‘y xizmati yoki ziyofatlarga kasbi yuzasidan borishini to‘g‘ri tushunishmaydi. Yoki ba’zi qizlar san’atni tushunishmagani uchun rad javobini berishyapti. Ulardan ranjiganim yo‘q, peshanaga yozgani bo‘ladi, — deydi Dilshodbek Kattabekov.
Yorqinxo‘ja Umarov – 29 yoshda
“Jana-jana” qo‘shig‘i bilan xalqimiz ko‘nglidan joy olgan xonanda Yorqinxo‘ja Umarov ham hali bo‘ydoqlar safini tark etgani yo‘q. Uning xonanda Afro‘za bilan iliq munosabatda ekanligi haqida xabarlar tarqalgandi. Ammo to‘ydan negadir darak yo‘q.
— Oilamizdagi yolg‘iz erkak, ota o‘rnidagi mas’ul shaxsman. Yaqindagina singlimni uzatdik. Undan avval uylanishni istamadim. Nasib qilsa, endi onamga yaxshi hamsuhbat bo‘ladigan, xizmatlarini qilib, duosini oladigan qizga uylanaman, — deydi xonanda Yorqinxo‘ja Umarov.
Amirxon Umarov — 27 yoshda
“Ochiqchasiga gaplashamiz” shousi orqali tomoshabinlarga yaxshi tanish bo‘lgan teleboshlovchi Amirxon Umarov ham ayni oila quradigan yoshda. Afsuski, o‘ziga munosib qizni topolmayotgani tufayli hali ham bo‘ydoqlar safini tark etolmayapti. Bir paytlar u hamkasbi Madina Nig‘matullayevaga uylanishi haqida mish-mishlar tarqalgandi. Ammo Madina aktyor yigit bilan oila qurdi. Shu kunlarda esa Amirxon Umarov boshqa hamkasbi Husnora Shodiyeva bilan iliq munosabatda ekani haqidagi mish-mishlar tarqaldi.
— Nasib qilsa, to‘y bo‘ladi, harakatdamiz. Hamkasblarim bilan o‘rtamizdagi munosabat haqida tarqalayotgan gap-so‘zlar shunchaki mish-mish. Husnora Shodiyeva hamkasbim, — deydi Amirxon Umarov.
Shohrux Hamdamov — 27 yoshda
Aktyor Shohrux Hamdamov xonanda Munisa Rizayevaning “Ovuna” klipida suratga tushganidan keyin ular oila qurishi haqida mish-mishlar tarqalgandi. Oradan 4 yil vaqt o‘tdi hamki, to‘ydan darak yo‘q.
— Bu klipdan keyin “Munisaga uylanasizmi? Chiroyli juftlik bo‘libsizlar” degan gaplarni ko‘p eshitdim. Ammo bu ijod, real hayot emas. Munisa bilan do‘stmiz, hattoki unga uylanish fikri xayolimda ham bo‘lmagan. Xolalarim meni uylantirishga anchadan beri harakat qilishadi. Har doim “Ozgina karyera qilishim kerak”, deb rejalarini o‘zgartiraman, — deydi aktyor Shohrux Hamdamov.
Shаhzod Sultonov — 26 yoshda
Aktyor Shahzod Sultonov va Feruza Normatova o‘rtasidagi munosabat ko‘plab mish-mishlarga sabab bo‘lgan. Ammo to‘ydan darak yo‘q, eng qizig‘i, partnyorlar bir-biri bilan oila qurish niyatida emas.
— Feruza bilan partnyormiz, xolos. Biz haqimizdagi tarqalayotgan gaplar mish-mishdan bo‘lak narsa emas. Onam bir yildan buyon meni uylantirishga jiddiy ahd qilgan. Ammo bandasi ming urinsa ham, peshanaga yozgan vaqtda to‘y bo‘lar ekan. Mening ham taqdirimga chiroyli, oqila va oilaparvar inson yozilgandir, deb umid qilyapman, — deydi aktyor Shahzod Sultonov.
Ozod Xurramov — 21 yoshda
Aslida bu ro‘yxatga bloger va aktyor Ozod Xurramovni kiritmasligimiz kerak edi. Chunki u boshqa qahramonlarimizdan ancha yosh. Ammo talabgir instablogerning shaxsiy hayoti hammaga qiziq.
— Voy, uylanish haqida o‘ylayotganim yo‘q. Hali yoshman-ku. Ammo uylanishdan avval qiladigan ishlarim ko‘p, — deydi instabloger Ozod Xurramov.
Mavzuga doir:
Izoh (0)