“Yor-yor” ko‘rsatuvi boshlovchisi, jurnalist Muhabbat Hamroyeva “Daryo” internet-nashriga eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.
Jurnalist Muhabbat Hamroyeva suhbat davomida oilasi bilan ijarada yashagan yillari, haligacha farzandlariga qattiqqo‘lligi, oilasi haqida gapirib berdi.
Avvalo, qadamingiz qutlug‘ bo‘lsin, 30-35 yillardan buyon shu xalqqa xizmat qilib kelayotgan bo‘lsam, shuncha yillardan buyon birinchi jurnalist uyimga kirishi. To‘g‘risini aytadigan bo‘lsam, akangiz, ya’ni turmush o‘rtog‘im bunday piar yoki intervyularni qo‘llab-quvvatlamaydilar. “Mehmon bo‘lib kelishsa, bosh ustiga, ammo intervyu shart emas”, deydilar.Uyimizda tong juda ham erta sahardan boshlanadi. Uzog‘i bilan 7:00 yoki 7:30 da hamma ishga ketadi.
(Kulib) Hovlimizni akangiz bilan bo‘lishib olganmiz. Hovlining menga tegishli bo‘lgan qismiga gullarni, jambillarni o‘zim ekkanman. Daraxtlarni akangiz ekkanlar.
Hovlimizdagi ushbu favvorani akangiz bilan birgalikda shunday toshlar bilan bezatib, tayyorlatishni niyat qilganmiz va xuddi shunday tayyorlatganmiz. Akangiz bilan kelishmay qolgan vaqtlarimda shu favvora yoniga borib, arazlab o‘tirib olaman. Shunaqa kichkinagina uyda yashaymiz.
Bu xonadonga 2004-yilda ko‘chib kelganmiz.
Uzoq yillar ijara uyda yashaganmiz. Ijara uyda faqat bitta gilamchamiz bo‘lardi. U gilamchani ham uyning egasi rahmi kelgani uchun bizga bergandi. Erkin Vohidovning ko‘chalarida, “Huvaydo” ko‘chasida Mahfuza opa degan opaning uyida ijarada yashaganmiz. Eng yomoni, uyimiz sement qilingan yer edi. Juda ham zax edi, bel o‘shanda olingan. Bitta palos, to‘rtta ko‘rpacha, ikkita kosamiz bo‘lgan.
Akangizning birorta o‘rtog‘i kelib qolsa, men chiqib turardim, chunki kosamiz ikkita bo‘lgan. Buxorodan, uydan hech narsa olib kelmaganmiz. Chunki men ham otasiz o‘sgan qizman, akangiz ham oddiy dehqonning bolasi bo‘lganlar. Orqamizda katta tanishlarimiz bo‘lmagan. Hayotda nimagaki erishayotgan bo‘lsak, eng avvalo, Allohimning ne’mati sababli va akangiz ikkalamizning tinimsiz mehnatimiz sababli deb o‘ylayman.
Muhabbat Hamroyeva, jurnalist, boshlovchi, prodyuser
Akangiz ham juda aqlli insonlar. Ularning miyalari kompyuter deyman. Bojxona sohasidagi eng aqlli, zukko insonlardan biri. Hayot yo‘llarimda nimadandir qoqiladigan bo‘lsam, shu insondan maslahat so‘rab, bilmaganlarimni o‘rganaman. Kichkinagina uychamizda, o‘ziga xos katta qalbli inson bilan yashayman.Muhabbat Hamroyeva Buxoro viloyati, Shofirkon tumanida dunyoga kelgan. MTRK hamda boshqa xususiy telekanallarda “Erta so‘ngan yulduzlar”, “So‘nmas yulduzlar”, “Unutmoq osonmas sizlarni”, “Baxt formulasi” “Sukunat tug‘yonlari”, “Yor-yor” ko‘rsatuvlarining 3 000 dan ortiq soniga mualliflik va boshlovchilik qilgan. Muhabbat Hamroyeva “Sevinch nolasi”, “Erta so‘ngan yulduzlar”, “Sevgingdan baxtiyorman”, “So‘nmas yulduzlar”, “Kechikkan kitob” asarlari muallifi. “Shuhrat” medali sohibasi. “Ijod media” prodyuserlik markazi rahbari. Oilali, uch farzandning onasi, besh nabiraning buvijonisi.Uchta farzandimiz bor. Barchasi oliy ma’lumotli. Birorta farzandimizga ota-onasining nomidan foydalanishga ruxsat bermaganmiz. Chunki biz nimaga erishgan bo‘lsak, tanish-bilishlarsiz, “tanka”-yu qo‘ng‘iroqlarsiz o‘zimiz erishganmiz. Sizlar ham shunga o‘rganasizlar, deganmiz. Yiqilgan bola qaytib turishni, burni qonagan bola artib, tozalashni o‘rgansin, yiqilgan turib, etagini qoqib, yo‘lida davom qilishni o‘rgansin, deymiz.
Bolalarim “Vatan” to‘yxonasida ofitsiant bo‘lib ishlaganida “ey, Muhabbat opa, nima qilyapsizlar, bolalaringiz nega ofitsiant bo‘lib ishlayapti, sharmandalik emasmi”, deyishgan. Akangiz shunda “mening bola tarbiyamga aralashmang”, degandilar. Men ham buni to‘g‘ri qabul qilganman. Lekin bolangizning og‘ir mehnat qilishini kuzatib turish oson bo‘lmas ekan.
Muhabbat Hamroyeva, jurnalist, boshlovchi, prodyuser
Izoh (0)