Голливуднинг афсонавий режиссёри Стивен Спилберг карьерасидаги илк клипни iPhone’да суратга олди

Голливуднинг машҳур режиссёрларидан бири Стивен Спилберг «Mamford & Sons» гуруҳидаги хонанда Маркус Mamfordнинг «Каннибал» таронасига клип суратга олди. Бу Спилбергнинг 50 йиллик фаолиятидаги биринчи клипи ҳисобланади.

Суратга олиш ишлари 3 июль куни Нью-Йоркдаги мактаблардан бирининг спорт залида бўлиб ўтди. Спилберг клипни ўзининг iPhone’нида, қора ва оқ рангдаги бир кадрда суратга олди. Мамфорднинг рафиқаси актриса Кери Маллиган костюмлар ва овозлар устида ишлаган.

Уч карра «Оскар» соҳиби бўлган Спилбергнинг навбатдаги намойиш этилиши кутилаётган кинокартинаси «Фабелманлар» автобиографик фильми ҳисобланади. Ушбу фильм АҚШда жорий йилнинг 11 ноябрида катта экранларга чиқади. Режиссёрнинг болалик ва ўсмирлик йиллари ҳақидаги фильмда бош ролларни Мишел Уильямс, Пол Дано, Сет Роген ва Дэвид Линч ижро этган.

Маълумот учун, Стивен Спилберг 1946 йил 18 декабрда АҚШнинг Огайо штатида туғилган. Кейинчалик у Калифорния штатига кўчиб ўтади ва шу ердаги коллежда таҳсил олади. Стивен режиссёрликдан ташқари продюсер ва сценарий муаллифи сифатида ҳам танилган. Режиссёр бир қанча халқаро мукофотларга сазовор бўлган. Time журнали уни 2013 йилда асрнинг энг муҳим 100 кишиси қаторига киритди. Стивен суратга олган «Юра оламига саёҳат», «Жосуслик кўприги», «Линколн», «Мюнхен» каби кинокартиналар дунё бўйлаб машҳурликка эришди.