O‘zbekiston muzeylariga 2020—2022-yillarda 3,6 million sayyoh tashrif buyurdi. Bu bo‘yicha Madaniy meros agentligi hisobotida ma’lumot keltirilgan.
Ta’kidlanishicha, O‘zbekistonda so‘nggi yillarda “Muzeylar to‘g‘risida”gi qonun ijrosini ta’minlash va sayyohlar oqimini yanada ko‘paytirish uchun bir qator ishlar amalga oshirildi. Oxirgi 5 yilda 20 dan ortiq yangi muzey faoliyati yo‘lga qo‘yildi.
Shuningdek, muzeylarga tashrif buyuruvchilar soni sezilarli oshdi. Xususan, 2020—2022-yillar davomida jami 3,6 million sayyoh muzeylarga keldi. 2019—2022-yillarda jami 221,9 milliard so‘m mablag‘ tushdi. Shundan 165,8 milliard so‘mi davlat byudjetidan ajratilgan mablag‘lar, 56 milliard so‘mi byudjetdan tashqari mablag‘lar hisoblanadi.
Ilmiy darajaga ega bo‘lgan muzey xodimlarining oylik maoshi o‘rtacha 2,5 baravarga oshirildi. Bugungi kunda Madaniy meros agentligi tizimida jami 104 ta muzey va ularning filiallari faoliyat ko‘rsatib kelmoqda. Shundan 37 tasi asosiy muzey va 67 tasi filial hisoblanadi. Ularda jami 2223 nafar xodim faoliyat yuritmoqda.
Muzeylar tomonidan 2020—2022-yillarda jami 12 759 ta madaniy tadbir va ko‘rgazma o‘tkazilgan bo‘lib, 379 ta kitob va katalog nashr etilgan.
Vazirlar Mahkamasining 2017—2027-yillarga mo‘ljallangan davlat dasturi qabul qilingan va unga asosan muzeylar moddiy-texnik bazasini mustahkamlash bilan ayni bir vaqtda 8 ta muzey yangidan tashkil etilib, 21 tasi qayta tashkil etilishi belgilab qo‘yilgan. Shuningdek, yana 9 ta yangi muzey quriladi, 11 tasi rekonstruksiya qilinadi va 68 ta muzey zamonaviy talablar asosida mukammal ta’mirlanadi.
Izoh (0)