Maktab formasini ota-onalar o‘zi xohlagan tikuvchiga belgilangan tartibdagidek tiktirishi mumkin — Toshkent shahar xalq ta’limi bosh boshqarmasi (foto)

Yangi o‘quv yili uchun yagona formani maktablarning o‘zida tashkil qilinadigan yarmarkalarda sotuvga qo‘yish rejalashtirilmoqda.

Ota-onalar va mutaxassislar fikrlarini inobatga olgan holda maktab formasining shakli tasdiqlangan. Bugungi kunda yagona formani nafaqat bozordan sotib olish, balki ota-onalar o‘zi xohlagan tikuvchiga belgilangan tartibdagidek tiktirishi mumkin. Bu haqda Xalq ta’limi vazirligi tomonidan Olmazor, Yunusobod, Mirzo Ulug‘bek va Yashnobod tumanlarida joylashgan maktablardagi maktab formasi yarmarkasiga tashkil etilgan press-tur davomida ma’lum qilindi, deb xabar bermoqda “Daryo” muxbiri.

“Davlat umumta’lim maktablarida ta’lim olayotgan temir daftar, ayollar va yoshlar daftariga kiritilgan ijtimoiy himoyaga muhtoj oilalarning farzandi tekinga maktab formasi bilan ta’minlanadi. Hozirda ro‘yxatlar shakllantirilyapti, yangi o‘quv yili boshlangunga qadar maktab formasi bilan ta’minlash ishlari amalga oshiriladi”, — deydi Toshkent shahar xalq ta’limi bosh boshqarmasi mas’ul xodimi.

Qayd etilishicha, shu kungacha 100 dan ortiq maktab formasi nusxalari tavsiya etilgan, ularning ichidan saralangach, mana shu formalarda to‘xtaldi.