Buxoro viloyati, G‘ijduvon tumani Vazirshoh MFY hududida ko‘p miqdorda iste’molga yaroqsiz yog‘ mahsulotlarini ishlab chiqarayotgan sexi faoliyati yo‘lga qo‘yilgani aniqlandi. Bu haqda “Daryo”ga Milliy gvardiyaning viloyat bo‘yicha boshqarmasi axborot xizmati rahbari Murodjon Rahmatullayev xabar berdi.
Ta’kidlanishicha, tumandagi Vazirshoh mahallasida joylashgan “GSG” MCHJ ishchilarining jamiyatga tegishli eski binosiga ko‘plab yelim idishlarni tashib-kirib chiqishayotgani shu hududda o‘z xizmat vazifasini bajarib kelayotgan milliy gvardiya xodimlarining e’tiborini tortgan. Kuzatuvlar davomida xodimlar bu eski binoda yog‘ mahsulotlari ishlab chiqarilayotganidan xabar topishgan va mahsulotlarning sifat darajasi ularda shubha uyg‘otgan.
Ushbu kuzatuvga asosan, boshqarmasi xodimlari hamda Bosh prokuratura huzuridagi Departamentning G‘ijduvon tuman bo‘limi xodimlari bilan hamkorlikda “GSG” MCHJ faoliyati yuzasidan qonunga xilof ravishda sifatsiz yog‘ mahsulotlarini ishlab chiqarish va tarqalishiga qarshi kurashish maqsadida tezkor tadbir o‘tkazilgan.
Tadbir davomida milliy gvardiya xodimlarining shubhasi asosli ekani o‘z tasdig‘ini topgan. N.J. rahbarligidagi jamiyatga qarashli sex ko‘zdan kechirilganda, binoda 2 dona “rotinatsiya” uskunasi, 3 dona chigitni qayta ishlash uskunasidan chigitdan iste’molga yaroqsiz, inson salomatligiga ziyon yetkazish darajasi yuqori bo‘lgan sifatsiz paxta yog‘i ishlab chiqarayotgani aniqlangan.
Hozirda holat yuzasidan dastlabki surishtiruv harakatlari olib borilmoqda.
Izoh (0)