Ўзбекистон музейларига 2020—2022 йилларда 3,6 миллион сайёҳ ташриф буюрди. Бу бўйича Маданий мерос агентлиги ҳисоботида маълумот келтирилган.

Таъкидланишича, Ўзбекистонда сўнгги йилларда «Музейлар тўғрисида»ги қонун ижросини таъминлаш ва сайёҳлар оқимини янада кўпайтириш учун бир қатор ишлар амалга оширилди. Охирги 5 йилда 20 дан ортиқ янги музей фаолияти йўлга қўйилди.

Шунингдек, музейларга ташриф буюрувчилар сони сезиларли ошди. Хусусан, 2020—2022 йиллар давомида жами 3,6 миллион сайёҳ музейларга келди. 2019—2022 йилларда жами 221,9 миллиард сўм маблағ тушди. Шундан 165,8 миллиард сўми давлат бюджетидан ажратилган маблағлар, 56 миллиард сўми бюджетдан ташқари маблағлар ҳисобланади.

Илмий даражага эга бўлган музей ходимларининг ойлик маоши ўртача 2,5 бараварга оширилди. Бугунги кунда Маданий мерос агентлиги тизимида жами 104 та музей ва уларнинг филиаллари фаолият кўрсатиб келмоқда. Шундан 37 таси асосий музей ва 67 таси филиал ҳисобланади. Уларда жами 2223 нафар ходим фаолият юритмоқда.

Музейлар томонидан 2020—2022 йилларда жами 12 759 та маданий тадбир ва кўргазма ўтказилган бўлиб, 379 та китоб ва каталог нашр этилган.

Вазирлар Маҳкамасининг 2017—2027 йилларга мўлжалланган давлат дастури қабул қилинган ва унга асосан музейлар моддий-техник базасини мустаҳкамлаш билан айни бир вақтда 8 та музей янгидан ташкил этилиб, 21 таси қайта ташкил этилиши белгилаб қўйилган. Шунингдек, яна 9 та янги музей қурилади, 11 таси реконструкция қилинади ва 68 та музей замонавий талаблар асосида мукаммал таъмирланади.