Бухоро вилояти, Ғиждувон тумани Вазиршоҳ МФЙ ҳудудида кўп миқдорда истеъмолга яроқсиз ёғ маҳсулотларини ишлаб чиқараётган цехи фаолияти йўлга қўйилгани аниқланди. Бу ҳақда «Дарё»га Миллий гвардиянинг вилоят бўйича бошқармаси ахборот хизмати раҳбари Муроджон Раҳматуллаев хабар берди.
Таъкидланишича, тумандаги Вазиршоҳ маҳалласида жойлашган «ГСГ» МЧЖ ишчиларининг жамиятга тегишли эски биносига кўплаб елим идишларни ташиб-кириб чиқишаётгани шу ҳудудда ўз хизмат вазифасини бажариб келаётган миллий гвардия ходимларининг эътиборини тортган. Кузатувлар давомида ходимлар бу эски бинода ёғ маҳсулотлари ишлаб чиқарилаётганидан хабар топишган ва маҳсулотларнинг сифат даражаси уларда шубҳа уйғотган.
Ушбу кузатувга асосан, бошқармаси ходимлари ҳамда Бош прокуратура ҳузуридаги Департаментнинг Ғиждувон туман бўлими ходимлари билан ҳамкорликда «ГСГ» МЧЖ фаолияти юзасидан қонунга хилоф равишда сифатсиз ёғ маҳсулотларини ишлаб чиқариш ва тарқалишига қарши курашиш мақсадида тезкор тадбир ўтказилган.
Тадбир давомида миллий гвардия ходимларининг шубҳаси асосли экани ўз тасдиғини топган. Н.Ж. раҳбарлигидаги жамиятга қарашли цех кўздан кечирилганда, бинода 2 дона «ротинация» ускунаси, 3 дона чигитни қайта ишлаш ускунасидан чигитдан истеъмолга яроқсиз, инсон саломатлигига зиён етказиш даражаси юқори бўлган сифатсиз пахта ёғи ишлаб чиқараётгани аниқланган.
Ҳозирда ҳолат юзасидан дастлабки суриштирув ҳаракатлари олиб борилмоқда.
Изоҳ (0)