Ukraina birinchi xonimi Olena Zelenskaya 19-iyul kuni AQSHga rasmiy tashrif bilan keldi. Uni Oq uyda prezident Jo Bayden va uning rafiqasi Jill kutib oldi. Bayden Zelenskayaga guldasta sovg‘a qildi, deb yozmoqda CNN.
Ukraina prezidentining rafiqasi Vashingtonda AQSH Davlat kotibi Entoni Blinken bilan ham uchrashdi. Ular harbiy harakatlar va Rossiyaning Vinnitsaga bergan zarbasi oqibatlarini muhokama qildi (14-iyul kuni Rossiya qo‘shinlari Vinnitsa shahri markaziga bir nechta raketa otgan edi. 23 kishi, jumladan, uch bola halok bo‘lgan, yuzdan ortiq odam yaralangan).
Blinken Zelenskayaning harbiy harakatlar qurbonlariga psixologik yordam ko‘rsatish tashabbusini yuqori baholadi.
Davlat kotibining ta’kidlashicha, Qo‘shma Shtatlar Ukraina g‘alabasi tarafdori hamda mamlakat rasmiylariga iqtisodiy va gumanitar muammolarni, shuningdek, infratuzilmani tiklash masalasini hal qilishda yordam beradi.
Zelenskayaning Facebook sahifasida yozishicha, u Jill Baydenning taklifiga binoan AQSHga kelgan.
Zelenskaya Blinkendan tashqari AQSH Xalqaro taraqqiyot agentligi rahbari Samanta Pauer bilan ham uchrashdi. Ukraina birinchi xonimi Pauerga 2014-yilda Qrimning Rossiyaga qo‘shib olinishiga qarshi chiqqani uchun minnatdorlik bildirdi — o‘sha paytda Pauer AQSHning BMTdagi doimiy vakili bo‘lgan. Zelenskayaning ta’kidlashicha, hozirda Pauer boshchiligidagi agentlik Ukrainaga ruhiy salomatlik va psixo-ijtimoiy qo‘llab-quvvatlash milliy dasturini amalga oshirishda yordam bermoqda.
Vashingtonga tashrifi davomida Zelenskaya 1932—1933-yillarda Ukrainadagi Golodomor qurbonlari xotirasiga bag‘ishlangan yodgorlikni ziyorat qildi.
May oyi boshida Amerika prezidentining rafiqasi Ukrainaga kelgan edi. Zelenskaya va Bayden Ujgoroddagi vaqtinchalik yashash joyiga aylantirilgan maktabga tashrif buyurgan. Ular hunarmandchilik loyihasida ishtirok etgan. O‘shanda Jill Bayden Amerika xalqi Ukraina xalqini qo‘llab-quvvatlashini ta’kidlagan.
Izoh (0)