Ommaviy otishmalarning tez-tez sodir bo‘lishi AQSHni “doimiy motam tutadigan” mamlakatga aylantirdi, o‘qotar qurollar tufayli normal hayot rivoji buzildi, dedi AQSH vitse-prezidenti Kamala Xarris NAACP (Amerikaning oq tanli bo‘lmagan aholisi huquqi himoyachilari uyushmasi) fuqarolik huquqlari va ijtimoiy adolat bo‘yicha yig‘ilishida.
“Oxirgi 20 yil ichida bu mamlakatda ishlab chiqarilgan qurollar soni uch baravar oshdi. Bugun mamlakatimizda qurol-yarog‘ odamlardan ko‘ra ko‘proq”, — dedi u.
AQSHning aholini ro‘yxatga olish byurosi ma’lumotlariga ko‘ra, 2021-yil oxiriga kelib Qo‘shma Shtatlarda yashovchi aholining soni 331,89 milliondan ortiqni tashkil qilgan.
“Fuqarolik huquqi haqida gap ketganda Qurol xavfsizligi to‘g‘risida oqilona qonunlar zarurligi masalasi chinakam muammodir. Barcha jamoalar ega bo‘lishi kerak bo‘lgan huquq — bu ko‘chalarda urush qurollari bo‘lmagan xavfsiz joyda yashash”, — deya xulosa qildi Xarris.
U, shuningdek, AQSH prezidenti Jo Bayden tomonidan qurolga egalik qilish qoidalarini kuchaytiruvchi federal qonunning imzolanishini muhim va zarur qadam, deb atadi.
Gap Bayden iyun oyi oxirida imzolagan qonun haqida bormoqda. Ushbu qonun loyihasini Vakillar palatasining 234 a’zosi qo‘llab-quvvatlagan, 193 a’zo esa qarshi chiqqan. Hujjat 21 yoshgacha bo‘lgan qurol sotib oluvchilarni tekshirishni kuchaytirish, maktab xavfsizligini yaxshilash va psixiatr yordami uchun katta mablag‘ ajratishni nazarda tutadi.
Qonun Texasning Yuvalde shahridagi boshlang‘ich maktabda iyun oyi oxirida sodir bo‘lgan otishmadan keyin tayyorlangan. 18 yoshli Salvador Ramos talabalar va o‘qituvchilarga hujum qildi. U to‘pponcha va yarim avtomatik miltiq bilan qurollangan edi. Otishma paytida 21 kishi halok bo‘ldi — 19 bola va ikki nafar katta yoshli kishi. Hujumchining o‘zi ham hibsga olish paytida vafot etdi.
Bayden tez-tez sodir bo‘ladigan bunday ommaviy otishmalardan charchaganini aytdi va Kongressni qurol lobbisiga qarshilik ko‘rsatishga chaqirdi. “Biz harakatga o‘tishimiz kerak, menga bu qirg‘inga ta’sir qila olmaymiz deb aytmang”, — deya ta’kidladi u. Bayden so‘nggi o‘n yil ichida Qo‘shma Shtatlarda 900 dan ortiq ommaviy otishmalar sodir bo‘lganini eslatdi.
Izoh (0)