Fransiyada o‘t o‘chiruvchilari mamlakat janubi-g‘arbidagi Jironda departamentida davom etayotgan kuchli o‘rmon yong‘inlariga qarshi kurashmoqda. Bu haqda “Interfaks” fransuz OAVlariga tayanib, xabar berdi.
Yong‘in allaqachon 19,3 ming gektar o‘rmonni yo‘q qilgan. Ayni paytda olovni bartaraf etishga 2 ming nafar o‘t o‘chiruvchi jalb etilgan.
Kuchli yong‘in va shamol tufayli Bordo shahri deyarli butunlay tutun bilan qoplangan. Mahalliy aholi ijtimoiy tarmoqlarda ko‘chalardagi kuchli tuman hamda shaharning kulrang osmoni fotosuratlarini joylashtirmoqda, shuningdek, kuyindi hididan shikoyat qilmoqda.
Fransiyada anomal issiq ob-havo sharoiti fonida tabiiy yong‘inlar avj oldi. Seshanba (19-iyul) kuni mahalliy meteorologiya xizmatlari mamlakat g‘arbidagi 10 dan ortiq departamentlarda xavfning o‘ta yuqori – “qizil” darajasini e’lon qildi. 70 ga yaqin departamentlarda esa xavfning o‘rta yuqori – “to‘q sariq” darajasi qayd etilgan.
19-iyul kuni ba’zi hududlarda havo harorati Selsiy bo‘yicha 40 darajadan oshishi kutilmoqda.
Mavzuga doir: Yevropada keng ko‘lamli o‘rmon yong‘inlari yuz bermoqda, o‘t o‘chiruvchilar yetishmayapti (foto)
Izoh (0)