Eron hududlaridan issiq va quruq havo oqimi kirib kelishi natijasida 17-iyuldan boshlab mamlakatda yuqori harorat kuzatilmoqda.
Soha mutaxassislari ushbu jazirama hafta davomida saqlanib qolishi, xususan, 21–23-iyul kunlari mamlakatda kunduzi harorat 43–45 darajagacha, shimol, janub va cho‘l hududlarida esa 47 darajagacha ko‘tarilishini taxmin qilyapti.
Albatta, bunday noqulay iqlim, eng avvalo, surunkali kasalligi bo‘lgan, dispanser nazoratida turuvchi bemorlar, yosh bolalar, homilador ayollar va keksalar salomatligi uchun xavf tug‘dirishi mumkin.
Shu bois, ular sog‘ligini alohida tibbiy nazoratga olish, zarurat bo‘lganda o‘z vaqtida shoshilinch tibbiy yordam ko‘rsatish lozim. Ayniqsa, issiq havoda surunkali xastaliklar xuruj qilishini e’tiborga olsak, “Tez yordam” xizmati xodimlari zimmasiga bu borada alohida mas’uliyat yuklanadi.
“Yurtimizda anomal issiq boshlangan 17-iyuldan 20-iyul soat 06:00 ga qadar Respublika tez tibbiy yordam xizmatiga jami 130 ming 115 ta chaqiriq kelib tushdi”, — deydi Respublika shoshilinch tibbiy yordam ilmiy markazining Tez tibbiy yordam xizmatini muvofiqlashtiruvchi dispetcherlik markazi rahbari Davlatbek Yuldashev.
Murojaatchilarning 23 ming 421 nafarini qon bosimi ko‘tarilishi, nafas yetishmovchiligi, astma xurujlari va boshqa surunkali kasalliklari bo‘lgan bemorlar tashkil etdi. Ularning 4215 nafari esa gospitalizatsiya qilindi.
Qolaversa, ushbu sanalarda Toshkent shahar “103” xizmatiga jami 11 ming 821 ta chaqiriq kelib tushgan. Murojaatlarning 4 ming 235 nafarini qon bosimi ko‘tarilishi, nafas qisishi, astma va boshqa kasalliklar bo‘yicha bemorlar tashkil etdi. Ularning 2 ming 185 nafari esa davolanish uchun shifoxonalarga yotqizilgan.
Mamlakatda jazirama havo kuzatilayotgani bois Sog‘liqni saqlash vazirligining alohida nazorati yo‘lga qo‘yildi.
Xususan, O‘zbekistondagi 1010 ta poliklinika, 923 ta oilaviy shifokor punktida patronaj xizmatlari kuchaytirilib, surunkali kasalliklarga chalingan yotoq sharoitidagi bemorlarga o‘z vaqtida zarur tibbiy yordam ko‘rsatilmoqda.
Shuningdek, mamlakat bo‘ylab 2762 ta tez tibbiy yordam brigadasi aholidan bo‘ladigan chaqiriqlar uchun doimo shay holatda.
Shu o‘rinda Sog‘liqni saqlash vazirligi zarurat bo‘lmasa, aholidan jazirama payti tashqariga chiqmaslikni, tez-tez suyuqlik ichish, imkon qadar yog‘li, dudlangan taomlar tanovul qilmaslik, aksincha, ko‘proq meva va sabzavotlar iste’mol qilishni tavsiya etadi.
Izoh (0)