Samarqand viloyati Urgut tumanidagi to‘yxonada ommaviy zaharlanish va yuqori harorat tashxisi bilan odamlar shifokorga murojaat qilgani to‘g‘risida xabarlar tarqaldi. Tuman hokimligi holatni o‘rganib, bu bo‘yicha ma’lumot berdi.

Aniqlanishicha, 19-iyul kuni soat 22:00 atrofida Urgut tumani tibbiyot birlashmasiga qarashli yuqumli kasalliklar shifoxonasiga ikki bemor oziq-ovqatdan o‘tkir zaharlanishga gumon tashxisi bilan bo‘limga olib kelingan.

Bemorlar bilan suhbatda ular to‘yda turli salatlar yeganini ma’lum qilgan. Shifokorlar tomonidan kelgan bemorlarda kerakli muolajalar o‘tkazilgan. Tuman sanitariya va osoyishtalik markazi xodimlari hamda uchastka tibbiyot xodimlari bemorlarning yashash hududidagi kasallikka gumonlanganlarni tuman tibbiyot birlashmasi yuqumli kasalliklar shifoxonasiga kuzatuv uchun olib kelgan.

Gumondorlar tekshiruvdan o‘tkazilib, qoniqarli ahvoldaligi sababli uyiga javob berilgan. Hozirgi vaqtda shifoxonada ikki nafar bemor kuzatuvda bo‘lib turibdi. Ularning ahvoli o‘rtacha og‘irlikda.

Qayd etilishicha, holat “Jozmon” mahallasida deya noto‘g‘ri ma’lumot berilgan, voqea Urgut tumanining “G‘ishtmachit” mahallasida sodir bo‘lgan.

“Tuman tibbiyot birlashmasi yuqumli kasalliklar bo‘limi 80 o‘ringa mo‘ljallangan bo‘lib, COVID-19 bilan kasallangan bemorlar uchun qo‘shimcha 10 ta o‘rin tashkil etilgan. Ayni paytda yuqumli kasalliklar bo‘limida 85 nafar bemor davolanmoqda. Ijtimoiy tarmoqlarda tarqalgan 200 nafarga yaqin odam Urgut tuman yuqumli kasalliklar shifoxonasida yotibdi, deb tarqalgan xabar hech qanday asosga ega emasligini ma’lum qilamiz”, — deyiladi xabarda.