Telegram messenjeridagi kanallarning birida kosonlik Barno Ahmedova nomidan “Koson tumani hokimi obro‘sini saqlash uchun barcha aybni erim bo‘yniga oldi, aslida 60 yoshli odamni urib ketgan va uning o‘limiga sababchi bo‘lgan haydovchi hokimning o‘g‘li edi”, degan murojaat tarqatildi. Koson hokimligi axborot xizmati rahbari Dilshod Nabiyev mazkur axborotni rad etdi.
“Mazkur telegram kanal bugun ham navbatdagi uydirmani to‘qib chiqardi. 2020-yilda Koson tumani hokimligi xizmat avtomashinasining YTHga uchrashi bilan bog‘liq voqealar fonida mashinani boshqargan fuqaro R.Jo‘rayevning rafiqasi nomidan xabar joylashtirilib, eski voqealar umuman boshqacha talqinda yozib chiqildi”, — deydi Koson hokimining matbuot kotibi Dilshod Nabiyev.
Mas’ulning qo‘shimcha qilishicha, Barno Ahmedova Telegram kanal uchun hech qanday ma’lumot bermagan.
“Barno Ahmedova uning nomidan noto‘g‘ri xabarlar chiqarilganini va bu xabarlar oilaviy munosabatlariga jiddiy ta’sir qilganini aytdi. Shaxsan o‘zim mazkur oila a’zolari bilan bugun suhbatda bo‘ldim. Ular o‘z nomlarini sotib, internetga xabar yozayotgan kimsani topishda amaliy yordam so‘ramoqda. Intervyularni havola qilaman”, — deydi Dilshod Nabiyev.
Qo‘shimcha qilinishicha, Barno Ahmedova uning nomini yozib, noto‘g‘ri axborot tarqatgan Telegram kanali mas’ullari ustidan tegishli organlarga murojaat qiladi.
2021-yilning 15-yanvar kuni Koson hokimi yoki o‘g‘li boshqargani taxmin qilingan Captiva 60 yoshli fuqaroni urib yuborgani, jabrlanuvchi voqea joyida vafot etgani xabar berilgandi. Keyinchalik hokim YTHga uchragan mashinani almashtirmoqchiligi ma’lum bo‘ldi. Mazkur masala yuzasidan OAV vakillari uchun matbuot anjumani tashkil qilgan Asrol Boyqarayev YTHga uchragan mashinani ta’mirlash 276 million so‘mga tushishini, yangi mashina xarid qilish esa 260 million so‘m bo‘lishini aytib, YTHga uchragan mashinasini almashtirish sababini aytgandi. Shuningdek, hokim o‘sha matbuot anjumanida mashinasida YTH sodir etilganida rulda o‘zi yoki o‘g‘li bo‘lgani haqidagi farazlarni rad etgandi.
Izoh (0)