Buxoroda ozodlikdan cheklash jazosini o‘tayotgan fuqaro qo‘shnisining Laсetti rusumli avtomashinasini yoqib yubordi. Shu sabab u 2 yil muddatga ozodlikdan mahrum qilindi. Bu haqda “Daryo”ga Jinoyat ishlari bo‘yicha G‘ijduvon tuman sudi sudyasi Boborahim Ochilov xabar berdi.
Ma’lum bo‘lishicha, G‘ijduvon tumanida yashovchi A.R. mahalladoshi, kabutar boquvchi fuqaro F.B.ga uyida kabutar saqlashga qiziqishi ortayotganini aytib, undan 13 dona kabutar keltirib berishini so‘ragan. Ko‘p o‘tmay olib kelingan kabutarlarning ikki donasi yo‘qolgan. A.R. esa qo‘shnisidan yo‘qolgan kabutarlarni topib berishini talab qilgan. Qo‘shnisi esa “Bu kabutar bo‘lsa, uchib ketgan bo‘lishi mumkin. Mayli, hozircha bir dona o‘zimning kabutarimni sizning kabutarlaringizga qo‘shib qo‘yaman. Ikkinchi kabutaringiz uchib qaytib kelmasa, keyinroq yana bir dona kabutar beraman”, — deya tushuntirgan.
Bundan jahli chiqqan g‘ijduvonlik A.R. o‘ziga avvaldan tanish bo‘lgan, uyida benzin sotuvchi Amin ismli tanishining oldiga borib, u bilan spirtli ichimlik ichgan. Kechki payt uyiga qaytguncha tanishidan benzin olib, kabutar sotuvchi qo‘shnisi F.B.ning hovlisi oldida turgan Lacetti’ga benzin sepib, yoqib yuborgan. Va voqea joiydan qochib ketgan.
“Yarim tunda uxlab yotgan paytim avtomashinam pulti ovoz chiqardi. Uni o‘chirmoqchi bo‘lganimda, ovozi o‘chmadi. Xavotirlanib, o‘rnimdan turdim va derazam oynasidan qaradim. Ne ko‘z bilan ko‘rayki, mashinam yonayotgan edi. Zudlik bilan 101 xizmatiga qo‘ng‘iroq qildim. Juda tez fursatda o‘t o‘chirish guruhi yetib keldi. O‘z vaqtida yong‘inni o‘chirishdi. Yo‘qsa, u bundan ham battar oqibatlarni tug‘dirishi mumkin edi”, — degan sud-tergov jarayonlarida jabrlanuvchi.
Tergov-surishtiruv ishlari davomida A.R.ning jabrlanuvchiga 86 million 397 ming 465 so‘mlik moddiy zarar yetkazgani aniqlangan.
“Aybdor nafaqat, o‘z qo‘shnisiga, balki atrofdagilarning hayotiga ham ziyon yetkazishi mumkin bo‘lgan xavfli usulda jinoyat sodir etgan. Unga uzil-kesil bazaviy hisoblash miqdorining 50 baravari miqdorida, ya’ni o‘n ikki million ikki yuz ellik ming so‘m jarima to‘lanishi belgilangandan tashqari, Jinoyat kodeksining 173-moddasi (mulkni qasddan nobud qilish yoki unga zarar yetkazish) 2-qismi ham qo‘llanildi. Shu modda bilan u 2 yilu 6 oy muddatga ozodlikdan mahrum qilindi”, — deydi Boborahim Ochilov.
Izoh (0)