Shavkat Mirziyoyev raisligida 18-iyul kuni o‘tkazilgan ekin yerlari va tomorqadan samarali foydalanish orqali oziq-ovqat yetishtirishni va aholi daromadlarini ko‘paytirish mavzusida videoselektor yig‘ilishida Bekobod tumani “Mallaboy” mahallasidagi hokim yordamchisi yo‘lga qo‘ygan ijobiy tajribasi haqida so‘zlab berdi.
“Mana, Bekobodday og‘ir tumanda hokim yordamchisi qilayotgan ishlarni eshitdik. Hamma hokim yordamchilariga topshirig‘im bor. Ajratilayotgan ekin yerlarida ishsiz aholini dehqonchilikka o‘rgatish orqali daromadli qilish – sizlarning eng ustuvor vazifangizdir. Har bir gektarda 10-15 ishsizlarni band qilib, 3-marta hosil olish, urug‘, o‘g‘it, yoqilg‘i va mahsulot sotib olishni yo‘lga qo‘ysangiz, bilasizlarmi, el-yurt oldida qanday hurmat-e’tibor topasizlar!”, – dedi prezident.
“Daryo” muxbirlari “Mallaboy” mahallasida bo‘lib, u yerda hokim yordamchisi, yoshlar hamda xotin-qizlar yetakchilari bilan suhbatlashdi.
Prezident e’tirof etgan “Mallaboy” mahallasi haqida
“Mallaboy” mahallasi Bekobod tumani markazidan 7-8 chaqirim olisda joylashgan. Bu yerda 3092 nafar aholi istiqomat qiladi, 860 nafari 16-30 yoshdagilar. O‘tgan asrning 30-yillarida vodiylik Mallaboy ismli kishi oilasi bilan qamishzor, cho‘l bo‘lib yotgan bu qishloqqa kelib, dehqonchilik qiladi. Qo‘riq yerlar o‘zlashtirilayotgan u paytlarda katta maydonlarda atigi 3-4 oila dehqonchilik qilgan.
Uddaburon Mallaboy yerdan unumli foydalanishni biladigan asl dehqon bo‘lgani uchun qo‘l ostidagilar bilan qiyinchiliklarni yengib o‘tib, yildan-yilga mo‘l hosil ola boshlaydi. Shu tariqa odamlar ko‘chib kelib, aholi yashash punkti paydo bo‘ladi. Qishloqqa uning asoschisi nomi beriladi. Ma’lumotlarga ko‘ra, hozirda mashhur Mallaboyning avlodlari tumandagi “Jumabozor” MFYda istiqomat qilishadi.
Ayni damda mahallaning yer maydoni 744 gektarni tashkil etadi. “Mallaboy” qishloq fuqarolar yig‘ini tugatilgunga qadar “Guliston” QFY tarkibida bo‘lgan. 2016-yilda “Mallaboy” rasman mahalla fuqarolar yig‘ini sifatida tashkil etilgan. Hududdagi deyarli barcha xonadonda issiqxona mavjud. Issiqxonalarda bir yilda 3 marotaba hosil olinadi. Ayni paytda mahalla raisi sifatida Abdullajon Sirojiddinov faoliyat yuritadi.
“Aholi o‘z uyida issiqxona tashkil etilgandan so‘ng yillik 70 million so‘m qo‘shimcha daromad olishni boshladi”
“Mallaboy” mahallasida hokim yordamchisi lavozimida faoliyat olib borayotgan Javlon Musayev o‘tgan 6 oyda amalga oshirgan ishlar haqida gapirib berdi.
2022-yili prezident tashabbusi bilan mahallalarda hokim yordamchisi lavozimlari tashkil qilindi. Men yangi tizimga asosan Bekabod tumani “Mallaboy” mahallasida yanvar oyidan boshlab hokim yordamchisi sifatida ish faoliyatimni boshladim. Mahallada 535 ta xonadon, 3092 nafar aholi istiqomat qiladi. Aholining asosiy faoliyati dehqonchilikka ihtisoslashgan. Bugun kunda mahallada o‘z tomorqalarida issiqxona tashkil qilish va undan daromad olish amalga oshirilib kelmoqda. Mahallamizdagi 535 ta xonadonning 502 tasida issiqxona tashkil qilingan.Ushbu lavozimda ish boshlagan vaqtim aholiga imtiyozli kreditlar asosida issiqxona tashkil qilishni maqsad qilgandim. Shunga asosan 6 oy mobaynida 14 ta xonadonda imtiyozli kreditlar asosida issiqxonalar tashkil etildi. Qo‘shimcha ravishda aholining ehtiyojidan kelib chiqqan holda Bekobod tumani tomorqa kengashi bilan hamkorlikda 2 gektar yer maydoniga korporatsiya asosida issiqxonalar tashkil etdik. 48 ta xonadon ushbu issiqxonalarda ishlab, qo‘shimcha daromad olmoqda.
Issiqxona tashkil qilishga nima sabab bo‘lgan, uning nima foydasi bor? Issiqxonadan bir yil mobaynida 3-marta hosil olish mumkin. Oddiy tomorqa yer maydonida olinadigan 1 yillik daromad 10 million so‘mgacha yetadigan bo‘lsa, issiqxona tashkil etilgandan keyin 70 million so‘mga ko‘tariladi. Natijada aholining tomorqadan olayotgan daromadi oshdi.
2022-yilning 6 oyi mobaynida mahallamizda o‘tgan yilga nisbatan solishtirilganda ikki baravarga oshdi. Bularni ichki bozordan orttirib Rossiya va Tojikistonga 1700 tonnadan ortiq sabzavot mahsulotlari eskport qilindi.
Javlon Musayev, Bekobod tumani hokim yordamchisi
“36 nafar yoshlarga yer berdik, 5 nafariga kredit, bir nafariga tikuv mashinasi olib berdik”
“Mallaboy” mahallasi yoshlar yetakchisi Firdavs Dadaboyev yanvar oyida ushbu lavozimga tayinlanganidan keyin nima ishlar qilganini aytib berdi.
2022-yilning 19-yanvar kuni “Mallaboy” mahallasiga yoshlar yetakchisi lavozimiga tayinlandim. Ish boshlaganimdan keyin mahalladagi yoshlarni xatlov qildim. 16—30 yoshli fuqarolarimiz mahallamizda 718 nafarni tashkil qildi. Har bir xonadonga kirib yoshlarning bandligi, ishsiz yoki ishli fuqarolarni aniqlab oldik.Yanvar oyida aniqlagan bo‘lsak 32 nafar ishsiz yoshlarimiz bor edi, ularning bandligini ta’minlash maqsadida yoshlarimizga dehqon xo‘jaligi uchun yerlarni auksionda yutib olib berdik. 36 nafar yoshlarimizni ish bilan ta’minladik, ularga 10 yil muddatga 10 sotixdan yer olib berdik. Aprel oyida ekkan hosillari bugungi kunda pishib, daromadga kirishni boshladi.
Bir nafar yoshimizga subsidiya asosida tikuv mashinasi, to‘rt nafariga tadbirkorligini rivojlantirish uchun kredit olib berdik. Yana 5 kishini paxta zavodiga ishga kirgizdik.
Firdavs Dadaboyev, “Mallaboy” mahallasi yoshlar yetakchisi
“Mahallamiz ayollari ham davlat, ham ro‘zg‘or ishi bilan birgalikda, uylarida tashkil qilingan issiqxonalarda ham faol ishlayapti”
“Mallaboy” mahallasi xotin-qizlar yetakchisi lavozimida Qunduzxon Olimova 2018-yildan buyon ushbu lavozimda ishlashi va nima ishlar qilgani haqida gapirib berdi.
Men “Mallaboy” mahallasi xotin-qizlar yetakchisi lavozimida 2018-yildan buyon ishlayapman. Mahallamizda 3092 nafat aholi bo‘lib, shularning 45 foizini xotin-qizlar tashkil qiladi. Biz xatlov natijasida “Ayollar daftari”ning uchinchi bosqichini tugatdik. Biz bu bosqich natijasida 85 nafar ayolni qamrab oldik. Ularni 6 toifaga ajratib, 10 yilga mo‘ljallangan 10 sotixlik yerdan 31 nafar ayolga berdik. Hozir ayollarimiz shu yerda o‘zini-o‘zi band qilib ishlab kelmoqda.Mahallamiz ayollari ham davlat ishi, ham ro‘zg‘or ishi bilan birgalikda, o‘zi uylarida tashkil qilingan issiqxonalarda ham faol ishlayapti. Bugungi kunda mahallamizda ajrimlar, jinoyatchilik yo‘q.
“Ayollar daftari”ning 6-toifasida farzandi nogiron bo‘lgan ayollarning 12 nafari qamrab olingan. Ularning har biriga “Sahovat va ko‘mak” jamg‘armasi tomonidan 1 mln 200 ming so‘mdan moddiy yordam berildi.
Qunduzxon Olimova, “Mallaboy” xotin-qizlar faoli
Izoh (0)