Samarqand viloyati Urgut tumanidagi to‘yxonada ommaviy zaharlanish qayd etilgani haqida xabar berilgan edi. Bosh prokuratura matbuot kotibi holat bo‘yicha qo‘shimcha ma’lumot berdi.
Qayd etilishicha, Urgut tumanidagi to‘yxonalarning birida 18-iyul kuni bo‘lib o‘tgan marosimda mehmon sifatida qatnashgan 56 yoshli ayol 19-iyul kuni o‘tkir ovqat toksikoinfeksiyasi tashxisi bilan shifoxonaga murojaat qilgan.
Bemor ayolga tez tibbiy yordam ko‘rsatish bilan bir vaqtda yuqumli kasalliklar bo‘limi patronaj xizmati tomonidan ushbu ayol bilan to‘y marosimida ishtirok etgan bir nechta fuqaroning xonadoniga borilgan va ular yuqumli kasalliklar bo‘limiga taklif qilinib, tekshirishdan o‘tkazilgan.
Tekshirish vaqtida ular ichidagi yana 10 nafar (9 nafari ayol, 1 nafari erkak) fuqaroda yengil ovqat toksikoinfeksiyasi tashxisi borligi aniqlangan. Ko‘rsatilgan tez tibbiy yordam natijasida ularning sog‘lig‘i to‘liq yaxshilangan va 20-iyul kuni uyga javob berilgan.
Hozirda shifoxonada faqatgina dastlab murojaat qilgan bemor ayolga tibbiy yordam ko‘rsatib kelinmoqda va uning ham sog‘lig‘i yaxshilanib kelayotgani aniqlandi. Mazkur holat yuzasidan tuman prokuraturasi tomonidan tergovga qadar tekshirish harakatlari olib borilmoqda.
Ijtimoiy tarmoqlarda ushbu holatda 200 ga yaqin odam zaharlangani haqidagi xabar haqiqatga to‘g‘ri kelmasligi ham aytib o‘tilgan.
Izoh (0)