Бухорода озодликдан чеклаш жазосини ўтаётган фуқаро қўшнисининг Laсetti русумли автомашинасини ёқиб юборди. Шу сабаб у 2 йил муддатга озодликдан маҳрум қилинди. Бу ҳақда «Дарё»га Жиноят ишлари бўйича Ғиждувон туман суди судьяси Бобораҳим Очилов хабар берди.
Маълум бўлишича, Ғиждувон туманида яшовчи А.Р. маҳалладоши, кабутар боқувчи фуқаро Ф.Б.га уйида кабутар сақлашга қизиқиши ортаётганини айтиб, ундан 13 дона кабутар келтириб беришини сўраган. Кўп ўтмай олиб келинган кабутарларнинг икки донаси йўқолган. А.Р. эса қўшнисидан йўқолган кабутарларни топиб беришини талаб қилган. Қўшниси эса «Бу кабутар бўлса, учиб кетган бўлиши мумкин. Майли, ҳозирча бир дона ўзимнинг кабутаримни сизнинг кабутарларингизга қўшиб қўяман. Иккинчи кабутарингиз учиб қайтиб келмаса, кейинроқ яна бир дона кабутар бераман», — дея тушунтирган.
Бундан жаҳли чиққан ғиждувонлик А.Р. ўзига аввалдан таниш бўлган, уйида бензин сотувчи Амин исмли танишининг олдига бориб, у билан спиртли ичимлик ичган. Кечки пайт уйига қайтгунча танишидан бензин олиб, кабутар сотувчи қўшниси Ф.Б.нинг ҳовлиси олдида турган Lacetti’га бензин сепиб, ёқиб юборган. Ва воқеа жоийдан қочиб кетган.
«Ярим тунда ухлаб ётган пайтим автомашинам пульти овоз чиқарди. Уни ўчирмоқчи бўлганимда, овози ўчмади. Хавотирланиб, ўрнимдан турдим ва деразам ойнасидан қарадим. Не кўз билан кўрайки, машинам ёнаётган эди. Зудлик билан 101 хизматига қўнғироқ қилдим. Жуда тез фурсатда ўт ўчириш гуруҳи етиб келди. Ўз вақтида ёнғинни ўчиришди. Йўқса, у бундан ҳам баттар оқибатларни туғдириши мумкин эди», — деган суд-тергов жараёнларида жабрланувчи.
Тергов-суриштирув ишлари давомида А.Р.нинг жабрланувчига 86 миллион 397 минг 465 сўмлик моддий зарар етказгани аниқланган.
«Айбдор нафақат, ўз қўшнисига, балки атрофдагиларнинг ҳаётига ҳам зиён етказиши мумкин бўлган хавфли усулда жиноят содир этган. Унга узил-кесил базавий ҳисоблаш миқдорининг 50 баравари миқдорида, яъни ўн икки миллион икки юз эллик минг сўм жарима тўланиши белгилангандан ташқари, Жиноят кодексининг 173-моддаси (мулкни қасддан нобуд қилиш ёки унга зарар етказиш) 2-қисми ҳам қўлланилди. Шу модда билан у 2 йилу 6 ой муддатга озодликдан маҳрум қилинди», — дейди Бобораҳим Очилов.
Изоҳ (0)