O‘zbekiston 2022—2030-yillarda uran qazib chiqarishni 2 barobarga — yiliga 7,1 ming tonnagacha oshirishni rejalashtirmoqda. Bu haqda “Lex.uz” ma’lumotlar bazasida e’lon qilingan hujjatdan ma’lum bo‘ldi.
Hujjatga muvofiq, ishlab chiqarish hajmini 2021-yildagi 3,526 ming tonnadan 2030-yilda 7,1 ming tonnaga oshirish rejalashtirilgan. Maqsadga erishilgach, O‘zbekiston uran ishlab chiqarish hajmi bo‘yicha Qozog‘istondan keyin ikkinchi o‘ringa chiqadi.
Shuningdek, 2022—2030-yillarda geologiya-qidiruv ishlarini faollashtirish hisobiga uran zaxiralarining o‘sish sur’ati ko‘rsatkichlari – 4,7 ming tonnadan 10,5 ming tonnagacha yetishi tasdiqlandi.
Qaror bilan O‘zbekistonda uran qazib olishni ko‘paytirish bo‘yicha umumiy qiymati qariyb 460 mln dollarlik 20 ta investitsiya loyihasi ro‘yxati tasdiqlandi.
2021-yil ma’lumotlariga ko‘ra, O‘zbekiston uran zaxiralari bo‘yicha dunyoda yettinchi, qazib olish bo‘yicha esa beshinchi o‘rinda turadi.
Mamlakat uran mahsulotlari iste’molchisi emas va ishlab chiqarilgan barcha uran eksport qilinadi.
Avvalroq eng ko‘p uran ishlab chiqaruvchi davlatlar reytingi e’lon qilingandi.
Izoh (0)