Ukraina Yevropa va Amerikaning bir qancha yirik banklarini Rossiyani qo‘llab-quvvatlayotganlikda ayblab, mamlakat neftiga bog‘liq kompaniyalardan u bilan aloqalarni uzishni talab qilmoqda. Bu haqda Financial Times xabar berdi.
Ukraina prezidentining iqtisodiy maslahatchisi Oleg Ustenko banklar Rossiyadan neft yetkazib beruvchi kompaniyalarga kredit berish orqali Rossiyaning urushini uzaytirayotganini aytdi.
Shuningdek, ularga Ukrainani qayta qurish ishlarini moliyalashtirishga ruxsat berilmasligiga va’da berdi va moliya institutlaridan Rossiyaning neft va gaz kompaniyalaridagi ulushlarini sotishni talab qildi.
HSBC va Credit Agricole banklari Gazprom va Rosneft aksiyalariga ega. Citigrup Rossiya nefti bilan savdo qiluvchi Lukoyl va Vitol kompaniyalariga kredit beradi.
JPMorgan Vitolga kreditlar beradi va uning investitsiya fondi “Gazprom”, “Rosneft” va “Sberbank” aksiyalariga ega.
Ustenko urush tugagandan so‘ng, Ukraina Adliya vazirligi Xalqaro jinoiy sudga (ICC) banklarga qarshi da’vo arizasi berish niyatida ekanligini bildirdi.
Ukraina razvedka idoralari moliyaviy korporatsiyalarning Rossiya neft va gaz sanoatini qo‘llab-quvvatlashi haqida ma’lumot yig‘moqda, — deya qo‘shimcha qildi Ustenko.
Ma’lumotlarga ko‘ra, ICC hukumatlar yoki korporatsiyalarning harakatlarini tekshira olmaydi, lekin u ushbu tashkilotlarning shaxslarini tekshirishi mumkin.
Avvalroq nega Ukraina donining blokadasi dunyodagi ocharchilikning asosiy omili emasligi haqida xabar berilgandi.
Izoh (0)