Ukrainadagi koronavirus pandemiyasi, ta’minot zanjiri uzilishlari va qurolli mojarolar oziq-ovqat, yoqilg‘i va o‘g‘it bozorlarini jiddiy ravishda buzdi. Bu haqda xalqaro tashkilotlar, jumladan, Jahon banki va Xalqaro valyuta jamg‘armasi (XVJ) rahbarlarining qo‘shma bayonotida aytiladi.
Mutaxassislar iqtisodiy xatarlarni kamaytirish, narxlarning oshishiga olib keladigan savdo cheklovlarini olib tashlash bo‘yicha bir qator chora-tadbirlar ko‘rishga chaqirdi.
Hujjatda aytilishicha, Jahon oziq-ovqat dasturi (WFP) ma’lumotlariga ko‘ra, iyun oyigacha o‘tkir oziq-ovqat xavfsizligidan aziyat chekayotganlar soni 82 mamlakatda 345 millionga yetgan.
Taxminan 25 ta davlat oziq-ovqat eksportiga cheklovlar kiritdi, bu esa dunyodagi oziq-ovqat savdosining 8 foizdan ko‘prog‘iga ta’sir ko‘rsatdi va o‘g‘itlar narxi so‘nggi bir yil ichida ikki baravar oshdi.
Vaziyatning yanada yomonlashuviga yo‘l qo‘ymaslik uchun xalqaro tashkilot rahbarlari quyidagi choralarni ko‘rishni taklif qilmoqda:
- aholining zaif qatlamlariga zudlik bilan yordam ko‘rsatish;
- savdo va xalqaro oziq-ovqat ta’minotini rivojlantirish;
- ishlab chiqarishni ko‘paytirish;
- iqlimga chidamli qishloq xo‘jaligiga sarmoya kiritish.
Bayonot mualliflarining qayd etishicha, 2008-yildagi iqtisodiy inqiroz dunyoga global savdo cheklovlarining joriy etilishi bevosita oziq-ovqat narxlarining oshishiga olib kelishini o‘rgatgan.
Eksport cheklovlarini olib tashlash yetkazib berishdagi uzilishlarni minimallashtirish va narxlarni pasaytirishga yordam beradi, — deydi ekspertlar.
Bayonotni Jahon banki bosh direktori Devid Malpass, BMTning Oziq-ovqat va qishloq xo‘jaligi tashkiloti bosh direktori Syu Dongyu, XVJ bosh direktori Kristalina Georgiyeva, WFP ijrochi direktori Devid Bisli va Jahon savdo tashkiloti bosh direktori Ngozi Okonjo-Iveala imzoladi.
Oziq-ovqat inqirozidan ocharchilik xavfi ostida turgan Afrika davlatlari eng ko‘p zarar ko‘rishi mumkin.
Izoh (0)