Birlashgan Millatlar Tashkiloti bosh kotibi Antoniu Guterrish Ukrainaning Vinnitsa shahriga uyushtirgan raketa hujumida 22 nafar tinch aholi, jumladan, uch nafar bola halok bo‘lgani va yuzdan ortiq kishi jarohatlangani haqidagi xabardan larzaga tushgan. Bu haqda BMT matbuot kotibi jurnalistlarning savoliga javoban aytib o‘tdi.
Ukrainada so‘nggi 24 soat ichidagi otishmalar Zaporojye, Nikolayev va Donetsk viloyatining bir qator tumanlarida tinch aholining qurbon bo‘lishiga va fuqarolik infratuzilmasining vayron bo‘lishiga olib keldi, dedi BMT matbuot kotibi o‘rinbosari Farxan Xak Nyu-Yorkdagi brifingda.
“Urush oqibatida muhim infratuzilma vayron qilinmoqda, millionlab odamlar tibbiy yordamdan, shuningdek, suv, elektr va gazdan mahrum bo‘lmoqda”, — dedi BMT vakili. Ukraina rasmiylari Mariupol aholisi haftasiga kishi boshiga besh litr ichimlik suvi olayotganini ma’lum qilgan.
“Jahon Sog‘liqni saqlash tashkiloti vabo tarqalishi xavfi haqida ogohlantirdi, ammo hozircha infeksiya holatlari aniqlanmagan”, — deya qo‘shimcha qildi Farxan Xak.
Ukraina bo‘ylab 800 ga yaqin aholi punkti elektr ta’minotisiz, 230 mingdan ortiq xonadon va korxona gazsiz qolgan. Donetsk viloyati aholisi hujumlardan eng ko‘p jabrlangan.
Izoh (0)